Pep Guardiola po kalon sezonin e tij më të vështirë në karrierën e tij drejtuese si trajner. Tekniku spanjoll është vënë në qendër të kritikave për formën që po kalon Manchester City në kampionat ashtu si dhe në Uefa Champions League, ku rezultatet mungojnë.
Pasi ka rivonuar kontratën me Citizens deri në vitin 2027, ai ka marrë dhe vendimin për të ardhmen e tij se çfarë do të ndodhë me të pas aventurës gati 8 vjeçare me këtë skuadër.
“Nuk po flas për të ardhmen afatgjatë, por ajo që nuk do të bëj është të largohem nga Siti, të shkoj në një vend tjetër dhe të bëj të njëjtën gjë si tani. Nuk do të kisha energji. Mendimi për të filluar diku tjetër, i gjithë procesi i stërvitjes e kështu me radhë… Jo, jo, jo! Ndoshta një ekip kombëtar, por kjo është ndryshe. Unë duhet të ndaloj, si këta kuzhinierë që shkojnë në vende të tjera. Të ndalem dhe të shoh se çfarë kemi bërë mirë dhe çfarë mund të bëjmë më mirë dhe kur je i zënë gjithë ditën, ditë pas dite, nuk ke kohë për ta bërë këtë. Dua ta lë këtë dhe të shkoj të luaj golf, por nuk mundem. Mendoj se ndalimi do të më bënte mirë”.
53-vjeçari tregoi gjithashtu se çfarë ka ndërmend të bëjë pasi të lërë këtë profesion.
“Unë jam ende i ri dhe kur të ndalem, ka disa gjëra që dua të bëj. Një prej tyre është të mësoj frëngjisht, t’i kushtoj kohën time të lirë vetes në mënyrë që të luaj golf dhe më pas të filloj të mësoj se si të gatuaj gjëra të thjeshta. Një nga terapitë më të mira që kam është kur janë turnetë kryesore të golfit dhe nga e enjtja në të diel unë përgatis ndeshjet e mia në shtëpi ose këtu në ‘Tast’ (restoranti spanjoll që zotëron Pep në Mançester). Unë shoh rivalin tonë dhe pamjet, por gjithmonë me golfin në sfond”.
