Hetimet lidhur me atentatin e ndodhur të dielën në Athinë, ku mbeti i vrarë 47 vjeçari Irakli Davella dhe u plagos 46 vjeçari Edi Lulo, kanë marrë një tjetër rrjedhë duke ndryshuar dhe hartën e veprimeve të autoriteteve.
Sipas burimeve nga policia greke, objektiv i atentatit ishte shtetasi i plagosur, lindur në Gjon të Pukës dhe banues në Kamëz. Pas komunikimeve me autoritetet shqiptare është vërtetuar se i plagosuri ka ndërruar identitet, me policinë vendase e cila ka zbuluar se kush është identiteti i vërtetë i shqiptarit.
Ai rezulton gjithashtu i dënuar në Greqi për ngjarjen e vitit 2011, ku u mbajtën peng disa punonjës në Dhomën e Avokatëve të Athinës dhe nën kërcënimin e armëve u grabitën 405.000 euro. Bashkë me këtë ngjarje ai u akuzua edhe për grabitje të tjera, si një rast një klinikë mjekësore në Pagrati të Athinës ku u grabitën pajisje me vlerë 110.000 euro.
Për këto ngjarje ai u dënua nga drejtësia greke. Pasi kreu burgun, mësohet se u riatdhesua në Shqipëri. Kohët e fundit jetonte në Dubai dhe në datën 9 dhjetor ka ardhur në Greqi me identitetin Edi Lulo. Me këtë identitet rezulton i regjistruar edhe në Shqipëri, ku rezulton edhe pronar i një biznesi në Durrës.
Burime bëjnë me dije se nga ana e policisë greke janë mbledhur disa të dhëna që mund të çojnë në identifikimin e autorëve. Nga komunikimi me policinë shqiptare është mësuar se Edi Lulo në Shqipëri konsiderohet një personazh i rëndësishëm dhe për këtë po mblidhet informacion edhe për konfliktet e tij por edhe për arsyen e ardhjes në Greqi.
Mësohet se para ngjarjes Edi Lulo dhe Irakli Davella po pinin kafe bashkë me dy persona të tjerë. Njëri ishte çuar më para nga tavolina, ndërsa ngjarja ka ndodhur kur Lulo, Davella dhe personi i tretë po shkonin për tek automjetet e tyre. Sapo kanë nisur të shtënat, personi i tretë është larguar dhe po kërkohet ende nga policia për të dhënë dëshmi.
Gjendja e 46-vjecarit Edi Lulo paraqitet tepër e rëndë, për shkak të plagëve të marra në kokë e bark.
/E.S
