Merr fund makthi i barazimeve! Juventusi është rikthyer te fitorja në kampionat pas 4 barazimesh radhazi, dhe plot 43 ditësh pa fitore, teksa mbrëmjen e sotme mposhti Monzën me rezultatin 1 me 2 në një duel tepër të luftuar. Të 3 golat u shënuan në pjesën e parë.
McKennie hapi serinë e golave në minutën e 14-të, ndërkohë që Birindeli vendosi përkohësisht baraspeshën 8 minuta më pas. Ndërkohë në minutën e 39-të, ishte radha e Nico Gonzalez për të gjetur rrugën e rrjetës, duke “vulosur” shifrat në 1 me 2.
Ky ishte triumfi i shtatë në 17 javë për Juventusin, që është ngjitur në vendin e gjashtë me 31 pikë. Në duelin e radhës që do të zhvillohet më 29 dhjetor, “Zonja e Vjetër” do të përballet me Fiorentinën në shtëpi./ D.C
