Qeveria e Kinës ka kundërshtuar vendimin e Shteteve të Bashkuara për t’i ofruar më shumë ndihmë ushtarake dhe për t’i shitur armë Tajvanit, duke e akuzuar Uashingtonin për “luajtje me zjarrin”.
Presidenti i Shteteve të Bashkuara, Joe Biden, ka autorizuar furnizimin e Tajvanit me materiale dhe shërbime nga Departamenti i Mbrojtjes, duke përfshirë edhe edukimin dhe trajnimin ushtarak, me një vlerë prej rreth 571 milionë dollarësh. Po ashtu, Departamenti i Mbrojtjes i SHBA-së njoftoi të premten se kishte miratuar një shitje armësh për Tajvanin në vlerë 295 milionë dollarë.
Tajvani është një ishull demokratik me 23 milionë banorë dhe ka qenë i vetëqeverisur që nga vitin 1949, kur ndodhi ndarja e tij nga Kina pas Luftës Civile. Shtetet e Bashkuara, përmes shitjes së armëve dhe mbështetjes ushtarake, synojnë të ndihmojnë Tajvanin të mbrohet dhe të parandalojnë një sulm nga Kina.
Ministria e Jashtme e Tajvanit ka mirëpritur miratimin e këtyre dy shitjeve, duke theksuar se ky veprim “rikonfirmon angazhimin e SHBA-së për mbrojtjen e tij”./K.B
