Kush tha që darkat në shtëpi janë të bezdisshme? Në fakt, ato mund të jenë arma sekrete kundër ankthit social. Imagjino këtë: një darkë e vogël, ku secili njihet me secilin, atmosfera është e ngrohtë dhe ti ke plot mundësi të flasësh pa presion.
Zero situata të sikletshme, zero gota bosh dhe mbi të gjitha, zero monologë të pafund për punë të mërzitshme. Më poshtë janë 5 arsye pse duhet të mendosh seriozisht për të organizuar një darkë (ose për të marrë pjesë në një të tillë) dhe si mund të ndihmojnë në zbutjen e ankthit:
1. Më pak “gara sociale”
Nuk ka turma të mëdha, as sfida për të bërë përshtypje tek të tjerët. Në një darkë të vogël, të gjithë janë të ulur bashkë dhe biseda rrjedh natyrshëm. Mund të dëgjosh, të marrësh pjesë kur ndihesh gati dhe të mos shqetësohesh për “çfarë të them më pas”. Këtu nuk ka vend për ata që kërkojnë vëmendje ekstreme; të gjithë ndihen të barabartë.
2. Mund të përgatitesh
Qoftë si i ftuar apo si organizator, një darkë të jep kohë për t’u përgatitur. Si mysafir, mund të kërkosh një mik të përbashkët që të ndihmojë me prezantimet ose të pyesësh për vendin ku do rehatohesh. Si organizator, mund të përzgjedhësh me kujdes të ftuarit, të krijosh atmosferën ideale dhe të planifikosh bisedat e para.
3. Një sfidë sociale në kushte të kontrolluara
Një darkë është një mënyrë e lehtë për të dalë nga zona e rehatisë pa u ndierë nën presion. Mund të ftosh miq të rinj ose thjesht të bashkohesh me një grup që të jep siguri. Dhe, nëse gjërat bëhen të sikletshme, nuk ke nevojë të përballesh me presionin e zakonshëm të një feste të madhe. Rregullat i vendos ti.
4. Je në zonën tënde (nëse je organizatori)
Kur organizon vetë, ti kontrollon gjithçka: fton njerëzit që do, përgatit ushqimet që të pëlqejnë dhe vendos muzikën sipas qejfit. E mira? Edhe nëse ndodh ndonjë situatë e sikletshme, je në shtëpinë tënde dhe ke gjithmonë një “arratisje” të gatshme: një kontroll të shpejtë në kuzhinë ose një pushim në dhomën tënde.
5. Pushime të vogla për të rifituar qetësinë
Në darka, ka gjithmonë një mënyrë për të marrë një pushim. Mund të shkosh të kontrollosh diçka në kuzhinë, të marrësh ajër në ballkon apo thjesht të shkëputesh duke u marrë me ndonjë detaj të vogël. Këto pushime të vogla ndihmojnë për të ruajtur qetësinë dhe për të shijuar më shumë momentin.
Mbi të gjitha: perfeksioni nuk është i nevojshëm
Edhe nëse diçka shkon keq – një ushqim digjet, harron emrin e të dashurit të mikeshës tënde apo e humbet bisedën për një çast – mos u shqetëso. Askush nuk pret perfeksion dhe ndonjë e papritur mund të shndërrohet në një histori qesharake për herën tjetër.
Pra, çfarë po pret? Darkat e vogla janë shansi ideal për të krijuar kujtime, për të ndjerë më pak ankth dhe për të pasur një natë të këndshme mes njerëzve që të bëjnë të ndihesh mirë./K.K
