Hackerat pro-rusë sulmuan këtë të shtunë dhjetëra faqe të institucioneve shtetërore në Itali, përfshirë websiten e Ministrisë së Jashtme dhe dy aeroporteve të Milanos.
Grupi i hakerave “NoName” mori përgjegjësinë për sulmin përmes një deklarate në platformën “Telegram”, ku ata njoftuan se ky ishte një reagim ndaj rusofobëve të Italisë.
Sulmi ishte i tipit DDOS (Mohim i Shpërndarjes së Shërbimit Online), ku hackerat rritën trafikun në këto faqe me qëllimin për t’i bllokuar ato dhe për të ndaluar shërbimet online.
Zëdhënësi i Agjencisë së Sigurisë Kibernetike të Italisë njoftoi se pasojat e sulmit u zgjidhën brenda dy orëve nga ekipet e sigurisë. Ndërkohë, operatorët e dy aeroporteve në Milano deklaruan se nuk pati vonesa ose anulim fluturimesh si rezultat i sulmit./K.B
