QSUT ka reaguar pasi një 12-vjeçar ndërroi jetë në spitalin e Pediatrisë.
Familjarët jashtë kamerave akuzuan mjekët se i mituri nuk mori mjekimin e duhur.
Ndërsa, QSUT në një reagim për mediat, informon se pas ekzaminimeve të kryera, pacienti është diagnostikuar me miokardit akut, një sëmundje e rrallë, e cila shoqërohet me shkallë të lartë të vdekshmërisë.
Pavarësisht trajtimeve të kryera, sipas QSUT, ndarja nga jeta e të miturit ka qenë e pamundur të parandalohet.
Njoftimi i plotë:
“QSUT i shpreh ngushëllimet më të thella familjes së 12-vjeçarit L.S në këtë moment të vështirë.
Nisur nga interesi i publikut për rastin tragjik të ndarjes nga jeta të 12-vjeçarit, informojmë se pacienti L.S. është hospitalizuar në Spitalin Pediatrik të QSUT më datë 7 janar 2024 dhe ka ndërruar jetë më datë 8 janar 2025, në orën 01:45, në Shërbimin e Terapisë Intensive Pediatrike. Pas ekzaminimeve të kryera, pacienti është diagnostikuar me miokardit akut, një sëmundje e rrallë dhe e rrezikshme, e cila shoqërohet me shkallë të lartë të vdekshmërisë.
Pavarësisht kujdesit maksimal dhe trajtimeve të kryera sipas protokolleve mjekësore, ndarja nga jeta e pacientit ka qenë e pamundur të parandalohet.
Duke mirëkuptuar dhimbjen e familjes dhe interesin e publikut, QSUT riafirmon përkushtimin për transparencë dhe për ofrimin e trajtimeve më të mira për çdo pacient.” Thuhet ndër të tjera në njoftim./ S,M
