Drejtori i Përgjithshëm i Policisë së Shtetit, Ilir Proda, priti sot (9 Janar) në një takim ambasadorin e Turqisë, Tayyar Kağan Atay.
Përveç vlerësimit të bashkëpunimit dhe rezultateve që i cilësuan si historike si me ambasadën, ashtu edhe me agjencitë ligjzbatuese të Turqisë, ata shprehën gatishmërinë për forcimin e mëtejshëm të këtij bashkëpunimit, ‘me qëllim goditjen e veprimtarive kriminale dhe kapjen e shtetasve në kërkim’.
Ky takim vjen një ditë pas ekstradimit të të shumëkërkuarit Gramos (Dritan) Rexhepi, nga Interpol Tirana, në bashkëpunim me homologët e Ankarasë. Proda ka shprehur falënderim në veçanti për kapjen në Turqi të Rexhepit dhe ekstradimin e tij në Shqipëri.
“Bashkëpunimi mes Policisë së Shtetit dhe agjencive ligjzbatuese të Republikës së Turqisë ka një bazë solide, sepse mbështetet në marrëdhëniet shumë të mira mes dy vendeve. Falënderoj Policinë e Turqisë, për kontributin e vlefshëm që ka dhënë për Policinë e Shtetit, si në aspektin logjistik, ashtu edhe në atë të trajnimeve të punonjësve të Policisë shqiptare. Policia e Shtetit është e hapur për zgjerimin e bashkëpunimit, për të krijuar ekipe të përbashkëta hetimore, duke shkëmbyer informacione dhe zhvilluar operacione të përbashkëta, si dhe për të zhvilluar vizita në të dyja vendet, për shkëmbimin e eksperiencave”, tha Proda mes të tjerash.
Ambasadori i Turqisë, Atay, ka vlerësuar gjithashtu bashkëpunimin mes agjencive ligjzbatuese të Republikës së Turqisë dhe Policisë së Shtetit shqiptar dhe garantoi kryepolicin shqiptar se ‘ambasada e Turqisë në Tiranë është e angazhuar maksimalisht për forcimin e këtij bashkëpunimi dhe për ofrimin e mundësive të reja për punonjësit e Policisë shqiptare, nga Policia turke’./kb
