Një raport tregon se numri i viktimave mund të jetë rreth 40 përqind më i lartë në 9 muajt e parë të luftës në Gaza. Analiza statistikore e publikuar në revistën The Lancet u krye nga akademikë në Shkollën e Higjienës dhe Mjekësisë Tropikale në Londër, Universitetin Yale dhe institucione të tjera.
Studiuesit vlerësuan 64,260 vdekje për shkak të lëndimeve traumatike gjatë kësaj periudhe, rreth 41% më e lartë se numri zyrtar i Ministrisë së Shëndetësisë palestineze. Studimi tha se 59.1% ishin gra, fëmijë dhe njerëz mbi moshën 65 vjeç.
Zyrtarët palestinezë thonë se më shumë se 46 mijë njerëz janë vrarë në Gaza.
Një zyrtar i lartë izraelit, duke komentuar studimin, tha se forcat e armatosura të Izraelit bënë përpjekje të mëdha për të shmangur viktimat civile.
“Asnjë ushtri tjetër në botë nuk ka marrë ndonjëherë masa kaq të gjera,” tha zyrtari.
“Këto përfshijnë dhënien e paralajmërimit paraprak për civilët për evakuim, zona të sigurta dhe marrjen e të gjitha masave për të parandaluar dëmtimin e civilëve. Shifrat e dhëna në këtë raport nuk pasqyrojnë situatën në terren.”
Lufta filloi më 7 tetor pasi persona të armatosur të Hamasit sulmuan përtej kufirit me Izraelin, duke vrarë 1200 njerëz dhe duke marrë më shumë se 250 pengje, sipas të dhënave izraelite./K.K
