Pas ndërprerjes së qarkullimit të kamionëve dhe autobusëve për kalim në Doganën e Kapshticës nga pala greke, duket se numri i mjeteve, kamionave dhe autobusëve të cilët po presin pranë kësaj dogane për të kaluar drejt Greqisë është tepër i lartë.
Udhëtarët dhe drejtuesit e automjeteve shprehen të shqetësuar për këtë situatë dhe thonë që presin mbi 3 orë për të kaluar doganën, ndërsa ende nuk kanë një përgjigje apo interesim nga pala
shqiptare, se kur do të hapet kufiri për ta. Gjithashtu nuk kanë asnjë përgjigje dhe apelojnë që autoritetet shtetërore të angazhohen, pasi pala greke mjetet e saj i lejon të qarkullojnë, përveç kamionëve.
“Si nuk është situatë e vështirë, është situatë e papranueshme. Shteti shqiptar duhet të bëjë një reagim, mirë kamionat se është çështje sigurie, por autobusët nuk i lejojnë edhe pse të pajisur. Ka fëmijë, pleq, gra shtatzëna, s’kanë ushqime, ku të rrinë, tualete s’ka, ku do rrinë, kanë probleme. S’ka sqarime nga shteti shqiptar, dikush duhet të dalë të japë shpjegime, çfarë të bëjmë, të rrimë të presim, sa do presim? Nga Greqia vijnë vetura dhe autobusë, kurse këtej nuk lejohen. Janë 6 autobusë me nga 50 vetë që presin, gati 300 vetë. Dikush të angazhohet. Në Greqi janë rrugët e hapura”, thotë një prej qytetarëve.
Ata shprehen se ishin të painformuar paraprakisht për këtë mbyllje dhe se situata i gjeti të papërgatitur. Teksa kanë edhe probleme me letrat në vendin fqinj nëse nuk kalojnë, ndaj kërkojnë zgjidhje të situatës.
“Nuk e dimë se kur do hapet nga pala greke. Ne premë biletat dhe u nisëm, erdhëm këtu dhe na thanë po nuk e dinim. Situata shumë e vështirë, ja shiheni vetë mes të ftohtit. Duhet të ikim patjetër, më digjen dhe letrat po s’kalova sot. Agjencitë të na japin një zgjidhje, o letrat, o lekët e të ikim me taksi. Duam një zgjidhje”, thotë një tjetër.
Por teksa qëndrojnë prej 3 orësh mes të ftohtit dhe borës që nuk ka të ndalur dhe bie me intensitet, ata shprehen se ka edhe probleme pasi shumë pasagjerë janë gra, fëmijë dhe të moshuar, teksa presin për tre orë.
“Kemi 3 orë që presim. Njerëz, kalamaj, gra, ftohtë është. Nuk e dimë e sa orë do presim, nuk jep kush zgjidhje. Duhet të kalojmë patjetër se kemi problem me dokumentet”, apelon një tjetër qytetar.
Dogana greke njoftoi mbylljen e kufirit që nga dita e djeshme në orën 17:00 për autobusët dhe kamionët./e.t
