Viti 2025 ka nisur me një vrull të ndjeshëm, ku lagjet dhe rrugët e qytetit po marrin një pamje më të gjelbër dhe të organizuar falë punës së palodhur të punëtorëve të qytetit. Në këtë kuadër, janë ndërmarrë hapa konkrete si mbjellja e pemëve të reja dhe zëvendësimi i atyre të dëmtuara, duke ruajtur uniformitetin estetik dhe funksional të hapësirave publike.
Krahas përpjekjeve për një qytet më të gjelbër, fillimi i vitit ka sjellë edhe zëvendësimin e stolave të vjetër me të rinj, si dhe shtimin e tyre në zona të ndryshme. Ky proces ka nisur me mobilimin urban në lulishtet kryesore, përfshirë ato në lagje si pranë “Ora News”, bllokun e pallateve afër Bulevardit Gjergj Fishta dhe lulishten “Viktor Eftimiu” në qendër të qytetit.
Punimet do të vijojnë çdo ditë me synimin për të përmirësuar cilësinë e jetës në çdo njësi, duke i dhënë qytetit një frymë të re dhe një atmosferë më mikpritëse për banorët dhe vizitorët./ S.M
