Zëvendëskryeministrja, njëherësh Ministër i Infrastrukturës dhe Energjisë, Belinda Balluku ka folur për herë të parë për memorandumin trepalësh të nënshkruar në Abu Dabi mes Shqipërisë, Italisë dhe Emirateve të Bashkuara për ndërtimin e linjës nën ujore të transmetimit.
Gjatë një takimi me punonjës të Operatorit të Sistemit të Shpërndarjes, në rolin e lexuesve të matësve të energjisë, Balluku u ndal tek rëndësia që ka kjo linjë në objektivin strategji të shndërrimit të Shqipërisë në vend eksportues neto të energjisë deri në vitin 2030.
“Në ndërkohë unë do të ndalesha vetëm për një moment përsa i përket lajmit të javës së kaluar marrëveshjes trepalëshe midis Shqipërisë, Emirateve të Bashkuara dhe të Italisë, përsa i përket linjës së interkonjeksionit që do të lidhë vendin tonë me brigjet italiane.
Shqipëria është një nga vendet më mirë të ndërlidhura nga ana e interkonjeksionit me disa linja, atë që e lidhë me Greqinë, me Kosovën, me Malin e Zi. Një linjë që ndërtohet sot për ta lidhur me Maqedoninë e Veriut.
Kapacitetet me Greqinë do të shtohen, nisëm një punë për ta dyfishuar, tashmë do ta trefishojmë për shkak të volumeve që kërkohen të përcillen, por nga ana tjetër linja e cila do të lidhë në mënyrë nënujore Shqipërinë me Italinë e çon Shqipërinë në një nivel tjetër të transmetimit të energjisë elektrike”, tha Balluku.
Zëvendëskryeministrja shtoi më tej se “është një betejë e re kjo e linjave të transmetimit, intekonjeksioni, një nga proceset më të rëndësishme të paketës së sektorit energjetik ku Shqipëria gjithashtu kërkon që të ketë lidershipin në rajon, për t’u kthyer deri në vitin 2030 në një forcë eksportuese neto ndërkohë që ne sot vazhdojmë dhe importojmë një pjesë të sasisë e cila duhet për të mbuluar kërkesën e tregut shqiptar”.
Marrëveshja e nënshkruar pak ditë më parë në Abu Dabi mes Qeverisë Shqiptare, asaj Italiane dhe Emirateve të Bashkuara Arabe i bashkon vendet në një aleancë strategjike me fokus sektorin energjetik.
Nënshkrimi i një marrëveshjeje të tillë është një moment historik për sektorin tonë i cili vitet e fundit po zhvillohet me ritme të shpejta sa i takon rritjes së kapaciteteve prodhuese, përmes diversifikimit të burimeve të rinovueshme./ S,M
