OSHEE po kërkon 120 lexues të rinj për matësit e energjisë elektrike në të gjithë Shqipërinë, që do t’i bashkohen trupës aktuale prej 870 faturuesish.
Aplikimet do të jenë të hapura deri më 5 shkurt dhe do të kryhen online.
Rekrutimet po bëhen për të siguruar që çdo abonent do të faturohet saktë për sasinë e energjisë që konsumon.
“Procesi i leximit të matësve të energjisë elektrike zhvillohet javën e fundit të muajit deri në 2-3 ditët e muajit pasardhës. Zgjat gati 12 ditë dhe janë të angazhuar 870 lexues për të lexuar rreth 1 milion e 350 mijë konsumatorë. Ngarkesa që çdo lexues ka për zhvillimin e procesit është gati 1500 abonentë. Për t’ju paraprirë ndryshimeve të çmimit, në mënyrë që të gjithë të përfitojnë drejt uljen e çmimit, kemi menduar që këtë numër ta shtojmë me 120 lexues të rinj, në mënyrë që edhe ngarkesa e punës për lexuesit të zvogëlohet dhe të rritet sa më shumë cilësia në shërbim”, tha Alban Ibrahimi, drejtor në departamentin e matjes dhe mbështetjes së tregut, OSSH.
Procesi i leximit kryhet përmes disa pajisjeve, në dukje sa një smartphone, ku janë ngarkuar të gjithë abonentët për t’u lexuar.
“Pasi zhvillohet procesi i leximit manual, pajisja sinkronizohet me sistemin e faturimit, ku kemi filtra të rinj për të identifikuar raste të anomalive në lexim. Nëse si rezultat i leximit, konsumi i njërit rezulton mbi 700 kilovat, por faturimi i tij mesatar në muajt e tjerë është nën 700 kilovat, kjo konsiderohet anomali dhe kalon për verifikim. Më pas shihet nga struktura, shihet fotoja e leximit, koordinatat e vendit ku është bërë fotoja dhe më pas, nëse duhet info shtesë, ekipi paraqitet sërish në vendin ku është leximi”, sqaroi Ibrahimi.
Nevoja më e madhe për lexues është në Tiranë, Elbasan dhe Durrës./kb
