Mund të duhen 10 dëri nw 15 vjet për të rindërtuar Rripin e Gazës , pasi nuk ka mbetur pothuajse asgjë, tha i dërguari special i presidentit amerikan Donald Trump në një intervistë për agjencinë e lajmeve Axios.
Steve Witkoff, i dërguari i Trump për Lindjen e Mesme, e dha këtë intervistë pasi përfundoi turneun e tij në rajon sot, e enjten 30 janar.
“Njerëzit po lëvizin në veri për t’u kthyer në shtëpitë e tyre dhe për të parë se çfarë ndodhi dhe ata kthehen dhe largohen… nuk ka ujë, nuk ka energji elektrike”, tha Witkoff.
Tetë pengje të tjerë të mbajtur nga Hamasi në Gaza u liruan sot mes skenave kaotike si pjesë e marrëveshjes së armëpushimit me Izraelin.
Tre izraelitë dhe pesë shtetas tajlandezë iu dorëzuan Kryqit të Kuq nga Hamasi përpara se të transferoheshin te forcat izraelite dhe të dërgoheshin në Izrael, raporton BBC.
Kryeministri izraelit, Benjamin Netanyahu, ka vendosur që 110 palestinezët do të lirohen pas “lirimit të sigurt” të pengjeve, pas lirimit të tyre kaotik në Gazë.
Ky është lirimi i tretë i pengjeve që kur hyri në fuqi marrëveshja e armëpushimit mes Izraelit dhe Hamasit më herët gjatë këtij muaji.
Marrëveshja për armëpushim ka në qendër përfundimin e luftimeve, që nisën më 7 tetor 2023 mes Izraelit dhe Hamasit, dhe lirimin e pengjeve që mbahen nga Hamasi, por edhe qindra palestinezëve të burgosur në Izrael.
Sipas marrëveshjes, qindra mijëra palestinezë po ashtu janë kthyer në veri të Gazës në tre ditët e fundit.
