Analisti Milaim Zeka ka rrëfyer me emocion dhe nostalgji, lidhjen e tij me Tiranën, kryeqytetin e Shqipërisë.
Edhe pse banon në Kosovë, Milahimi tregon se Tirana është qyteti i tij i dashurisë, ku njohu bashkëshorten dhe këtu ka krijuar gjithë rrjetin shoqëror.
“Tirana është qyteti i dashurisë sime, i lotëve të mi. Stokholmi është qyteti i qetësisë sime shpirtërore, ndërsa Prishtina është qyteti i mallit, për të cilin më ka marrë malli.
Meqenëse unë jam arratisur nga Drenica, vendlindja ime shumë i ri, në vitin 1982 dhe pastaj asnjëherë nuk kam mundur t’i vizitoj as prindërit e mi, e as Drenicën, mua nuk më lidh asgjë me Prishtinën.
Çdo gjë më ka lidhur dhe më lidh me Tiranën.
Miqtë e mi krijues, artistë, shkrimtarë, gazetarë, i kam pasur këtu. Edhe nusen e kam nga Tirana. Fëmijët e mi, katër gocat që kanë lindur në Suedi, janë të lidhura shumë me Shqipërinë.
Edhe brenda mureve të shtëpisë në Stokholm unë ua pata ndaluar të flasin suedisht apo anglisht, vetëm shqip. Ato zotërojnë sot 5 gjuhë të huaja, edhe në mesin e asaj që unë e kam quajtur tempulli i shenjtë, është gjuha shqipe”, tha Zeka në Dekalog./ S,M
