“Partia Demokratike është e vetmja alternativë. Ka treguar që di të qeverisë, ka treguar që ka ditur të rezistojë edhe kur kanë dashur ta zhdukin dhe që ka treguar që ka një program dinjitoz”.
Kështu u shpreh Jozefina Topalli, në lidhje me garën që PD ka me partinë në pushtet për zgjedhjet e 11 Majit.
Kur u pyet nëse PD-ja ka njerëz për të zëvendësuar Sali Berishën, Topalli u përgjigj shkurt se nuk ka.
“Nuk ka. Që kur ka dalë, Sali Berisha ka sjellë një frymë tjetër brenda strukturave dhe jashtë tyre.
Në vitin 2017, ai që ishte në krye të PD, zhduku klasën politike dhe mori një grup njerëzish që ishin mirë me kryetarin. Tani ky kapitull është mbyllur dhe është një realitet tjetër.
Deri tani, nuk ka njeri në PD që ta zëvendësojë Berishën. Partia Demokratike e ka kryetarin e saj, për të ardhmen do të kemi kohë të flasim”, shtoi Topalli.
Kur u pyet nëse do të kandidojë në primare, Jozefina Topalli tha se nuk e ka menduar shumë këtë gjë.
“Jam e përqendruar tjetërkund. Nuk do merrem me primaret aktualisht, por unë në jetën time politike nuk kam hyrë me listën e kryetarit, por kam kandiduar duke pasur tjetrin përballë. Prandaj nuk e mendoj ndoshta”, tha Topalli në studion e “Ditarit” ./ S.M
