Shkodra vazhdon që të jetë ndër qarqet me numrin më të lartë të rasteve të kultivimit të kanabisit.
Për këtë arsye prefektja e qarkut të Shkodrës, Majlinda Angoni, në një mbledhje me Task Forcën Antikanabis, ka kërkuar që secili nga anëtarët e kësaj task force të marrë përgjegjësitë për të hequr këtë njollë të zezë, siç e cilësoi ajo.
“Është për të ardhur keq që qarku i Shkodrës është një ndër qarqet me nivelin më të lartë të kultivimit të kanabisit. Prandaj kam një mesazh për të gjithë drejtuesit e institucioneve, për të gjithë kryetarët e Bashkive, që të marrin përgjegjësi konkrete sipas ligjit që i përcakton, për të qenë në hapat e parë të parandalimit të këtij akti”, tha Angoni.
Ndërkohë drejtori i Policisë së qarkut të Shkodrës kërkoi një bashkëpunim më të ngushtë mes institucioneve dhe drejtorive lokale, pasi vetëm në këtë mënyrë mund të sulmohet me efikasitet kjo veprimtari kriminale./e.t
