Autoritetet në Kaliforni kanë lëshuar një paralajmërim për një lumë atmosferik që kërcënon të sjellë reshje të dendura shiu, erëra të forta dhe përmbytje në zonat e goditura së fundmi nga zjarret. Ndaj qytetarëve iu shpërndanë thasë me rërë, u vendosën varkat e shpëtimit, ndërsa qytetarët u këshilluan që të përgatisin thasë me artikujt më të nevojshëm, raporton AP.
Ndërkohë, zyrtarët në Oregon dhe Idaho hapën strehimoret emergjente për t’u përgatitur për borën dhe akullin e parashikuar. Në Kaliforninë Jugore parashikoheshin rreth 15 centimetra shi në male dhe rreth 7.6 centimetra në zonat bregdetare dhe luginat. Hidrologu i Shërbimit Kombëtar të Motit Brent Bauer thotë se erërat e forta mund të rrëzojnë pemë, të shkaktojnë ndërprerje të energjisë elektrike dhe të vonojnë fluturimet.
Një paralajmërim evakuimi është lëshuar në Kanionin Mandeville dhe zona të tjera të shkatërruara nga zjarri i Palisades, zjarri më shkatërrues në historinë e Los Anxhelosit. Shkollat në Malibu thuhet se do të mbyllen sot.
Shiu pasoi stuhitë që sollën reshje të mëdha bore dhe shi në lindje të Shteteve të Bashkuara nga Kentaki në Uashington, duke shkaktuar qindra aksidente trafiku, ndërprerje të energjisë dhe duke rritur rrezikun e përmbytjeve.
Rreth 7,000 fluturime u anuluan ose u vonuan në të gjithë Shtetet e Bashkuara të mërkurën, duke përfshirë fluturimet nga aeroportet e Uashingtonit. Në Virxhinia, ku u shpall gjendja e jashtëzakonshme, policia raportoi rreth 850 aksidente të martën dhe të mërkurën, në të cilat u plagosën dhjetëra njerëz, në Maryland u raportuan 235 aksidente dhe në jug të Virxhinias Perëndimore, rrugët kryesore u mbyllën përkohësisht për shkak të aksidenteve të trafikut.
Në veriperëndim të Oregon dhe në jugperëndim të Uashingtonit priten shi dhe borë të ngrirë, të cilat mund të shkaktojnë ndërprerje të energjisë, tha Shërbimi Kombëtar i Motit. Një gjendje e jashtëzakonshme është zgjatur në Oregon dhe gjashtë strehimore emergjente do të hapen. Parashikimi i një stuhie akulli për zonën e Portlandit herët të enjten dhe të premten mund të pengojë dërgesat e luleve dhe dhuratave të tjera të Ditës së Shën Valentinit./ S,M
