Nga ARTUR AJAZI
Drejtësia e re, e ka nisur udhën e saj 5 vite më parë. E nisi mbarë, pasi SHBA dhe BE, i vuri në “rreshtore” edhe të pabindurit e PD. E votuan, dhe pas 24 orësh, nisën dhe ta sulmojnë, sikur nuk kishin votuar kurrë. E megjithatë, drejtësia e re, ishte dhe mbetet, një prej premtimeve dhe sfidave të kryeministrit të vendit Edi Ram. E them këtë se, në 30 e ca vite, askush nga politikanët e vjetër, nuk kishte kurajon dhe guximin për të nisur “revolucionin” e një përmbysje të madhe. Ishte momenti që Partia Socialiste dhe Edi Rama, ti thoshte botës dhe shqiptarëve se “kthim pas nuk ka, o bëjmë shtetin me ligje, o ikim nga pushteti”. Dhe e nisën betejën, fituan, dhe vazhdojnë ti mëshojnë faktit, se drejtësia e re do pavarësi dhe përkrahje nga politika dhe opinion qytetar.
Dhe në fakt, e nisi me “këmbë të mbarë”, si SPAK-u, ashtu edhe GJKKO-ja, si OPGJ-të dhe Policia e Shtetit, tanimë e rifreskuar dhe rimotivuar. Edi Rama, ka kthyer gjithçka “përmbys”, derisa e nisi si rrugëtim të mbarë reformimin e drejtësisë. Ishte i vetmi institucion ligjzbatues, ku çalonin ligjet, zbatimi i tyre, ku përzjeheshin bashkë ankesat e qytetareve, me vendimet e paligjshme. Ndaj duhej nisur pa asnjë vonesë puna. Shqipëria donte një Edi Rama, dhe ai erdhi. Erdhi pasi kishte bërë Tiranën si kryetar bashkie, dhe ja tani përballej me bajlozët e drejtësisë, plus Sali Berishën që pengonte reformën e nisur në çdo moment. Populli ishte i entuziazmuar, i thurrte lavde kryeministrit, madje edhe kreut të SPAK dhe GJKKO. Vitet po iknin, dhe në sytë e popullit, nisi disi venitja ndaj veprimeve të ndonjë prokurori. Lëshohej një urdhër-arresti për X politikan të lartë, dhe dështohej, pasi kishte ikur jashtë vendit, pastaj kërkohej një tjetër arrestim i ish-kryeministrit, apo ish-ministrave, dhe sërish nisnin presionet. U vërtetohej vjedhja, shkelja, abuzimi, me fakte dhe argumente kokëforta, dhe sërish puna ngadalësohej. Puna diku çalonte….Popullit po i zbehej entuziazmi.
Ai që duhej të ishte ishte në burg, dilte mes Tiranes dhe shante me libër farefisi, kreun e SPAK, kreun e GJKKO, dhe bënte karshillëk viktimave të pushtetit të tij të dikurshëm. “Foshnja” e parritur mirë SPAK, nisi të gjuhej me gurë. Dikush tjetër, arrestohej në zyrë, rrugë, banesë, edhe pse nuk ishte nevoja të bëheshin spaktakle të tilla. Dikush po e “vret” SPAK-un, GJKKO, dhe strukturat e reja të kësaj drejtësie. Në zyrat e tyre, kanë penetruar emra dhe njerëz pa kurrfarë kontributi në fushën e hetimit dhe gjykimit. Si ka mundësi ? Kush , dhe pse janë toleruar veprime dhe emërime të tilla, sa që zyrat e SPAK-ut apo GJKKO-së, të mbushen me avdallë aspak profesionistë ?
Kjo natyrisht mbetet për tu diskutuar dhe rishikuar nga krerët e institucioneve të drejtësisë së re. Diçka ka çeduar, dhe dikush po përfiton nga politika e djeshme apo e sotme. Edi Rama, ishte njeriu që deri sot nuk ka diskutuar kurrë ,( ndryshe nga Sali Berisha) vendimet dhe kundërveprimet e SPAK-ut apo GJKKO-së, edhe kur janë goditur eksponentë të qeverisjes socialiste. Por duket se kjo është marrë për “dobësi”, ndaj mbetet detyrim urgjent i mazhorancës politike dhe qeverisëse, të mos heshtë përpara absurditeteve të tilla, që po ngjasin në Pallatin e Drejtësisë së Re./ SM
