Arabia Saudite ka konfirmuar se gjatë Kupës së Botës 2034, e cila do të mbahet në pesë qytete saudite, nuk do të lejohet shitja e alkoolit. Këtë e bëri të ditur ambasadori saudit në Mbretërinë e Bashkuar, Princi Khalid bin Bandar bin Sultan Al Saud, duke deklaruar se vendi i tij nuk do të ndryshojë kulturën për të akomoduar të huajt.
“Ne nuk e lejojmë alkoolin, por shumë argëtim mund të bëhet pa të. Nuk është 100 për qind e nevojshme”, tha ai për radion britanike “LBC News”, duke nënvizuar dallimet kulturore mes Arabisë Saudite dhe vendeve të tjera.
Arabia Saudite u shpall zyrtarisht organizatore e Kampionatit Botëror të Futbollit për vitin 2034 nga FIFA në dhjetor të vitit 2024, duke u bërë vendi i dytë i Lindjes së Mesme që mirëpret këtë turne, pas Katarit në vitin 2022. Kampionati do të zhvillohet në 15 stadiume në qytetet Riad, Jedah, Khobar, Abha dhe Neom, një qytet futurist në ndërtim./e.t
