Kryeministri Edi Rama siguroi dje pensionistët se bonusi i premtuar do të shpërndahet në pranverë, siç edhe është bërë e ditur. Në rubrikën “Sy m’sy”, një komunikim i drejtpërdrejtë i kryeministrit me qytetarët në rrjetet sociale, Rama tha se fondi tashmë është i depozituar në Bankën e Shqipërisë. “Nuk kamë thënë kurrë që bonusi i pensionistëve jepet në shkurt. Kam thënë do të kemi një bonus pranvere dhe unë mendoj se nuk ka nevojë të ta them unë që pranvera nuk ka ardhur asnjëherë në shkurt.
Bonusi do të jepet në pranverë, fondi është i depozituar në Bankën e Shqipërisë dhe do të lëvrohet në pranverë”, theksoi Rama. Se kur fillon pranvera, vijoi Rama, pyet se ta thonë. “Pastaj nuk kuptoj ku lidhet bonusi me “spiunin, armikun e tradhtarin”. Sikur të gjithë këta të ishin si unë, atëherë shqiptarët do të kishin shpëtuar një herë e mirë nga armiku, tradhtia dhe spiunimi”, iu përgjigj ai qytetarit, i cili e quante “armik, spiun dhe tradhtar”, nënvizoi kryeministri Edi Rama.
Detajet
Ndërkohë kujtojmë se Këshilli i Ministrave në një mbledhje të posaçme, miratoi në fund të vitit që shkoi Aktin Normativ, për disa ndryshime në Buxhetin e Shtetit për vitin 2024. Bonusi i pranverës do të jetë 100 euro për ata pensionistë, pensioni mujor i të cilëve është nën 20 mijë lekë dhe 50 euro për të gjithë ata që vlera e pensionit mujor të të cilëve është mbi 20 mijë lekë. “Ministria e Financave, propozoi disa masa, pas një analize të kujdesshme të ecurisë së ekonomisë dhe treguesve fiskalë për periudhën janar- nëntor 2024.
Në këtë prag fundviti, e gjithë vëmendja jonë shkon në mbështetje të shtresave më në nevojë, kryesisht pensionistëve dhe familjeve me të ardhura të ulëta. Do të shpërndajmë 2.2 miliardë lekë në formën e shpërblimeve të menjëhershme për disa nga kategoritë sociale më vulnerabël; Konkretisht do të jenë përfitues të bonusit prej 15,000 lekësh të gjitha familjet që trajtohen me Ndihmë Ekonomike, Personat me Aftësi të Kufizuar (PAK), si dhe kujdestarët e tyre;
Nga ana tjetër do të vëmë në jetë premtimin për garantimin e bonusit të Pranverës, duke siguruar krijimin e një llogarie speciale në Bankën e Shqipërisë, në mbështetje të pensionistëve në të cilën do të transferohet një fond prej 6.3 miliardë lekësh; Në pranverë do të përfitojnë bonus në masën 10 mijë lekë ose 100 Euro të gjithë ata pensionistë, pensioni mujor i të cilëve është nën 20 mijë lekë dhe 5 mijë lekë ose 50 Euro të gjithë ata pensionistë, vlera e pensionit mujor të të cilëve është mbi 20 mijë lekë; Me një fond shtesë në masën 1.4 miliardë lekë do të mbështesim fermerët, duke siguruar investim të vazhdueshëm për një nga sektorët më prioritarë të ekonomisë, bujqësinë;
Gjithashtu do të alokojmë një fond shtesë prej rreth 1.6 miliardë lekë për të mbështetur bashkitë për shlyerjen e detyrimeve të prapambetura, si dhe për të përmirësuar ofrimin e shërbimeve publike ndaj qytetarëve; Angazhimi i Ministrisë së Financave mbetet i pandryshuar për të siguruar edhe në vijim trajektoren rënëse të nivelit të borxhit publik në raport me PBB-në, si dhe për të garantuar konsolidimin fiskal e qëndrueshmërinë e ekonomisë në tërësi”, thuhet në njoftim./ S,M
