Kryetari i Partisë Demokratike, Sali Berisha, ka kritikuar ashpër qeverinë, duke e akuzuar për dështime të theksuara në fushën e politikave sociale dhe përkeqësimin e kushteve të jetesës për qytetarët. Gjatë prezantimit të programit të PD për “Çështjet Sociale dhe Tregun e Punës”, Berisha theksoi se ndërkohë që pensionet në Shqipëri janë rritur modestisht, ato janë shumë të ulëta krahasuar me vendet e rajonit. Ai solli shembuj të pensioneve në vende si Mali i Zi, Maqedonia, Serbia dhe Bosnje-Hercegovina, të cilat janë dukshëm më të larta se në Shqipëri, ku pensioni mesatar është rreth 160 euro.
Berisha gjithashtu vuri në dukje rritjen e çmimeve të ushqimeve në Shqipëri, të cilat, sipas tij, janë rritur me 30% në raport me ato në Bashkimin Evropian. Ai tha se pensionet e shqiptarëve janë pothuajse të barabarta me pagesën që bëjnë gjermanët për të ushqyer qentë e tyre, duke e cilësuar këtë si një “realitet të padurueshëm” për qytetarët shqiptarë.
Kryetari i PD akuzoi qeverinë për shpërdorim të buxhetit dhe për një menaxhim të gabuar të ekonomisë, duke përmendur vendet e tjera të rajonit që kanë rritur ndjeshëm pensionet, pavarësisht resurseve më të kufizuara. Ai theksoi se qeveria shqiptare ka dështuar të sigurojë një shpërndarje të drejtë të pasurisë dhe ka lënë qytetarët shqiptarë të përballen me varfëri ekstreme, duke e detyruar një pjesë të madhe të shqiptarëve të largohen nga vendi.
Berisha gjithashtu e ka kritikuar qeverinë për dështimin në sektorin e shëndetësisë, duke folur për mungesën e ilaçeve dhe për keqmenaxhimin e burimeve shëndetësore, që sipas tij, ka ndikuar drejtpërdrejt në përkeqësimin e kushteve të jetesës për qytetarët.
Pjesë nga fjala e Berishës:
Mund t’u jap plot shifra të tjera. Po çfarë ndodhi?
Ndodhi që pensionistët, të cilët merrnin në vitin 2013 një pension mesatar 145 mijë lekë, sot marrin 160 mijë. Në atë kohë, ata merrnin më shumë se të gjitha vendet e rajonit.
Sot, pensioni në Mal të Zi është 450 euro.
Sot, në Maqedoni është 400 euro.
Në Serbi mbi 400 euro.
Në Bosnje-Hercegovinë, 300 e ca euro.
Në Kosovë, 190 euro.
Pra, në Shqipëri 160 euro.
Por, në qoftë se e krahasojmë dy periudhat, çmimet në Shqipëri në vitet 2005-2013, në raport me çmimet në BE, jo vetëm që nuk ndoqën trendin e tyre, por në raport me ato çmime, çmimet në Shqipëri ranë.
Kurse këto vite, çmimet e ushqimeve në raport me çmimet në BE, janë rritur me 30 përqind.
Pra, Shqipëria me çmime stratosferike dhe me pensione pothuajse të barabarta me pagesën që bën gjermani për qenin e shtëpisë. Gjermanët japin 130 euro për kafshën e shtëpisë, për qenin.
A ishte kjo mundësia? Kurrë nuk është kjo mundësia.
Po pse Mali i Zi të trefishojë pensionet? Çfarë ka? Rezerva, potenciale ekonomike shumë më të pakëta se Shqipëria.
Pse Maqedonia të trefishojë pensionet? Pse Serbia të trefishojë pensionet?
Ka vetëm një shkak, sepse bëhet një shpërndarje e buxhetit, e cila e konsideron qytetarin, e cila respekton dinjitetin e tij, e cila bën gjithçka t’ua lehtësojë jetën qytetarëve.
160 euro ka qenë paga minimale e rumunëve në vitin 2013, kur këtu ishte 180 euro. Sot paga minimale në Rumani është 830 lej, pra është afërsisht 800 euro.
Kurrë ndonjëherë nuk ka ekzistuar një grup njerëzish më amoralë në raport me qëndrimin ndaj qytetarit, se sa këta qeveritarë.
Si mundet? Si mundet ti të lësh qytetarët e tu në këtë mjerim ekonomik?
T’u lësh alternativë të vetme largimin nga Shqipëria.
Nuk po ndalem në fusha të tjera, se ato dihen.
Mos të raftë ndonjë sëmundje e rëndë, sepse të merr sëmundja nga mungesa e ilaçeve, jo se nuk mjekohet. Se ilaçe nuk ka.
Se ata që duhet të sigurojnë ilaçet, duhet të firmosin marrëveshje me X spital. Gënjeshtarë të shpifur.
Po ç’punë ka marrëveshja me ilaçet që i duhen Spitalit Onkologjik? Dihet që kushtojnë, por pa diskutim do i blesh ato./E.T
