Brenda një muaji, Shqipëria dhe Izraeli do të lidhen me anë të fluturimeve direkte. Zëvendës kryeministrja, njëherësh Ministre e Infrastrukturës dhe Energjisë, Belinda Balluku me anë të një postimi ka informuar se gjatë një vizite në Izrael ka zhvilluar një takim me drejtoren e kompanisë ajrore kombëtare izraelite ELAL .Balluku konfirmoi se fluturimi i parë do të realizohet në 2 prill në këtë mënyrë do të zgjerohet edhe mundësia e bashkëpunimit mes dy vendeve që historia i ka lidhur ngushtë prej kohësh ndërsa synim mbetet promovimi i vendit në prag të sezonit turistik.
“Duke nisur nga data 2 prill, Shqipëria dhe Izraeli do të lidhen direkt përmes fluturimeve të ndërsjellta, duke zgjeruar kështu mundësitë e bashkëpunimit mes dy vendeve që historia i ka lidhur ngushtë prej kohësh.
Fluturimi inaugurues më 2 Prill, do të sjellë në Tiranë personalitete të fushave të ndryshme nga sektori turizmit dhe showbiz, me fokus promovimin e vendit tonë si një atraksion turistik, më interesant për Evropën.”
Shqipërinë e vizituan gjatë viti të kaluar rreth 11 mijë turistë izraelitë ndërsa pritshmëritë janë më optimiste këtë vit./K.K
