Numri i njerëzve të prekur nga sëmundja e Parkinsonit pritet të dyfishohet në dekadat e ardhshme, duke arritur në 25.2 milionë deri në vitin 2050, nga 11.9 milionë në 2021. Ky është paralajmërimi i një studimi të ri të publikuar në BMJ, i kryer nga studiues në universitetet kineze dhe kanadeze.
Ekspertët e pavarur theksojnë nevojën urgjente për trajtime të reja dhe rritjen e mbështetjes sociale për pacientët. Sipas Amelia Hursey, drejtoreshë strategjike në Parkinson’s Europe, sistemet shëndetësore globale nuk janë të përgatitura për të përballuar këtë rritje të madhe të rasteve.
Studimi tregon se rritja më e shpejtë e rasteve do të ndodhë në Afrikën Sub-Sahariane Perëndimore (292%), ndërsa Azia Lindore dhe Azia Jugore do të kenë numrin më të madh të të prekurve. Rritje të konsiderueshme priten edhe në Evropë, me 50% më shumë raste në Perëndim dhe 28% në Evropën Qendrore e Lindore.
Ndryshimet demografike, stili i jetesës dhe ekspozimi ndaj faktorëve mjedisorë, si ndotja e ajrit dhe kimikatet toksike, janë ndër faktorët kryesorë të kësaj rritjeje. Ekspertët theksojnë se investimet në kërkime dhe përmirësimi i shërbimeve shëndetësore janë të domosdoshme për të përballuar sfidën në rritje./ k.k
