Bledjon Nallbati është shprehur se nuk e priste të ishte emri më i votuari në listën e Primarëve të personave që kanë shprehur interes për të qenë kandidat për deputet në radhët e PD-së.
Nallbati, u shpreh se politikën nuk e ka parë si mundësi për t’u bërë VIP, por si një mundësi për të ndihmuar njerëzit.
“Nuk e kam parë politikën si mundësi për t’u bërë VIP, por si një mënyrë për të mbështetur njerëzit që më kanë përkrahur.
Prisja një rezultat të mirë në Korçë, por nuk e mendoja se do të isha ndër më të votuarit në republikë. Falënderoj të gjithë anëtarët e PD që më besuan,” tha ai në emisionin Kjo Javë.
Nallbati shtoi se nuk është natyrë që kërkon komunikim të shpeshtë me liderin e partisë, duke e konsideruar këtë si një formë servilizmi.
“Nuk jam nga ata që komunikoj shpesh me kryetarin e PD, sepse më duket e tepërt dhe nuk e bëj dot këtë gjë. Por sa herë ka qenë e nevojshme, kam komunikuar me zotin Berisha,” u shpreh ai./k.k
