Kodi i ri Zgjedhor i detyron partitë dhe koalicionet që të dërgojnë 46 emra në listat e mbyllura. Por ‘Djathtas për zhvillim’, ‘Nisma Shqipëria Bëhet’ dhe Koalicioni Euroatlantik kanë gjetur skemën se si t’i shpëtojnë penalizimeve. Emrat e familjarëve te të mbyllurat me strategji dorëheqjeje, vetë tek të hapurat.
Tiranë– Ndryshimet e Kodit Zgjedhor detyrojnë të gjitha partitë që t’i nënshtrohen listave të mbyllura kur të dorëzojnë emrat e kandidatëve në Komisionin Qendror të Zgjedhjeve.
Të gjitha partitë e vogla në bllok kanë qenë kundër, duke kërkuar lista të hapura, madje kanë deklaruar se do të kandidojnë të gjithë në këto të dytat.
Dhe tashmë në shenjë “hakmarrjeje” ndaj PD-PS që votuan ndryshimet verën e kaluar në Parlament, është gjetur edhe “formula e artë” për të manovruar pa u goditur nga ligji.
Koalicioni “Djathtas për Zhvillim” e Alibeaj-Shehi, “Nisma Shqipëria Bëhet” e Lapaj-Shabani dhe Partia Euroatlantike e Lulzim Bashës, po përgatisin lista “fake” për pjesën e mbyllur.
Siç e kërkon kodi elektoral, ata duhet patjetër të paraqesin 46 emra në listat e mbyllura në KQZ, ndryshe penalizohen.
Të kontaktuar nga gazetarja e Report Tv, Esiona Konomi, ata konfirmuan se ‘në listat e mbyllura do të fusin gjyshërit apo të moshuar të afërm, me qëllim që t’i djegin dhe të dorëzojnë të gjithë mandatet’.
Vetë figurat publike të këtyre partive, do të garojnë në listat e hapura, ashtu edhe sikurse kanë deklaruar më herët.
Kjo skemë do të garantonte që asnjë të mos ishte i preferuar dhe të fitonte më i votuari mes tyre nga lista e hapur, mbi bazën e numrit të votave që do marrin. Disave ju janë administruar paraprakisht edhe dorëheqjet. Lista e hapur përmban 140 emra, aq sa ulëse ka edhe Parlamenti./k.k
