Qyteti i Vlorës përfshihet nga kushte të përkeqësuara atmosferike nga dita e sotme dhe për këtë shkak Kapiteneria e Portit ka njoftuar pezullimin për shkaqe sigurie të lundrimit për mjetet e vogla lundruese dhe të anijeve të peshkimit.
Kjo masë nuk është e vlefshme për anijet e mëdha tregtare apo tragetet. Ky pezullim lundrimi nisi sot në mesditë dhe do të vijojë deri në datën 15 mars (e shtunë).
Kapiteneria sqaron se përmirësimi i motit, kryesisht detit me dallgë të forta në Gjirin e Vlorës, do të nis nga mëngjesi i 16 marsit (e diel, ora 08:00), kur hiqet edhe ky pezullim.
Kapiteneria këshillon pronarët e mjeteve lundruese në fjalë që të marrin masat e nevojshme dhe të rrisin gadishmërinë.
Njoftimi i Portit të Vlorës:
“Njoftim për kushtet hidrometeorologjike të përkeqësura gjatë datave 13-15.03.2025 !
Në bazë të parashikimit për situatën hidrometeorologjike të përkeqësuar brenda dhe jashtë gjirit të Vlorës, gjatë datave 13-15.03.2025 duke filluar nga ora 12:00 datë 13.03.2025 në drejtimin JUG-JUG-LINDJE në forcën deri 6-7bft me shpejtësi ere deri 15-20m/s dhe lartësi dallge nga 1.50 deri 2.50 metra.
Me qëllim parandalimin e çdo situate të papritur për shkak të kushteve atmosferike, kërkojmë bashkëpunimin e të gjithë subjekteve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe rritje e gadishmerisë së ekuipazhit në mjetet lundruese.
1.ËSHTË NDALUAR PAISJA ME LEJE-NISJE I MJETEVE TE VOGLA LUNDRUESE DHE ATO TE PESHKIMIT TË CILAT OPEROJNË NË DET TË HAPUR, DUKE FILLUAR NGA ORA 12:00 DATË 13.03.2025.
2.TË GJITHË DREJTUESIT E MJETEVE TË VOGLA LUNDRUESE DHE ANIJEVE TË PESHKIMIT QË OPEROJNË BRENDA DHE JASHTË GJIRIT TË VLORËS TË MARRIN NË KONSIDERATË KUSHTET HIDROMETEOROLOGJIKE DHE MARJEN E MASAVE PËR SIGURIMIN E TYRE.
3.Anijet e transportit ndërkombëtar detar do të vazhdojnë të operojnë normalisht sipas destinacioneve përkatëse.
4.Përmirësimi i situatës hidrometeorologjike të përkeqësuar për mjetet e vogla lundruese dhe të peshkimit do të jetë mbas orës 08:00 të datës 16.03.2025”./E.T
