Siguria ushqimore është testi i radhës që Shqipëria duhet të kalojë edhe këtë vit në Ditën Botërore të Konsumatorit. Kjo si përpjekje për të fituar besimin e konsumatorëve e njëherazi për të marrë aprovimin e institucioneve të Bashkimit Europian.
“Në lidhje me sigurinë ushqimore në përgjithësi, kuadri ligjor ende nuk është në përputhje me Rregulloren e Ligjit të Përgjithshëm të Ushqimit. Kuadri ligjor për kontrollet zyrtare nuk është në përputhje me Rregulloren e Kontrollit Zyrtar. Autoriteti Kombëtar i Ushqimit) është duke rikonceptuar sistemin për statistikat e inspektimeve, menaxhimin e të dhënave dhe transparencën, por është ende e nevojshme punë e madhe për të ulur ngarkesën administrative për planifikimin dhe raportimin mbi kontrollet zyrtare të bazuara në rrezik”.
Nisur nga këto detyra që tanimë peshojnë edhe më shumë, Ministria e Bujqësisë ka hartuar edhe dokumentin e ri mbi politikat kombëtare për sigurinë ushqimore, ku synohen investime në rrjet laboratorësh e inspektoratesh, lehtësimi i progresit drejt akreditimit të metodave analitike parësore, përmirësimi i Analizës së Rrezikut dhe ai i Kontrollit të Brendshëm.
Forcimi i sistemit kombëtar të kontrollit agro-ushqimor është një përgjegjësi e përbashkët që përfshin palë të ndryshme të interesit, duke përfshirë organet qeveritare, industrinë ushqimore dhe konsumatorët, thuhet në dokumentin e hedhur për konsultim publik.
“Minë me sahat” që kërcënon seriozisht të gjithë zinxhirin e sigurisë ushqimore. Në këtë përfundim del qeveria, e cila pranon se Shqipëria nuk ka një ligj të posaçëm mbi shëndetin e kafshëve. Për të korrigjuar këtë problematikë të trashëguar nga ne shkuara, në Kuvend është depozituar projektligji “Për shëndetin e kafshëve”./E.T
