McLaren dominoi provat zyrtare në Albert Park në Melburn. Lando Norris do të niset nga Pole Position në Çmimin e Madh të Australisë, e cila është gara e parë e Botërorit 2025 në Formula 1.
Me një xhiro thuajse perfekte, ai e ndali kronometrin në kohën një minutë, 15 sekonda e 96 të mijtat, duke kaluar vetëm për 86 të mijtat idhullin e tifozëve vendas dhe njëkohësisht shokun e tij të ekipit, Oscar Piastri.
Nga vija e dytë do të nisen Max Verstappen me makinën Red Bull, i cili ishte 385 të mijtat më i ngadaltë dhe George Russell me Mercedes. Këta dy pilotë mbajtën përkohësisht kreun deri në xhiron e fundit, deri sa kampionët në fuqi për konstruktorë të McLaren treguan të gjithë forcën e tyre.
Surprizë në radhën e tretë ku janë japonezi Yuki Tsunoda me Racing Bulls dhe Alexander Albon me Williams-Mercedes. Zhgënjyese paraqitja e makinave Ferrari me Charles Leclerc dhe Lewis Hamilton, që nisen nga vija e katërt, përkatësisht në vendet 7 dhe 8.
Por, nëse kualifikueset e Leclerc u ndikuan nga zgjedhja teknike për ta patur makinën gati nëse bie shi gjatë garës, Hamilton duket se ka ende probleme në zotërimin e plotë të kokëkuqes. Kushtet atmosferike në Çmimin e Madh të Australisë duket se po përkeqësohen përpara garës së parashikuar të zhvillohet mëngjesin e së dielës./e.t
