Në qytetin e vogël Soure, në ishullin Marajó të Brazilit, policia ushtarake ka gjetur një mënyrë unike për të patrulluar rrugët dhe zonat e largëta: ata përdorin buaj, shkruan A2 CNN. Këto kafshë të fuqishme, që peshojnë rreth 800 kilogramë, janë ideale për terrenin e vështirë të ishullit, veçanërisht gjatë sezonit të shirave kur rrugët bëhen të pakalueshme për automjetet.
Sipas policisë, bufat janë të aftë të ndjekin të dyshuarit nëpër pellgje dhe të notojnë nëpër kënetat e dendura të rajonit. “Ka vende ku nuk mund të arrish me motor apo me varkë, por me buajt nuk të pengon asgjë”, tha për “Wall Street Journal” rreshteri i policisë, Ronaldo Souza.
Në Soure, një qytet me rreth 24 000 banorë, policët shfaqen çdo mëngjes në qendër të qytetit mbi buajt e tyre, një pamje kërcënuese për kriminelët. Banorët krenohen se ky është një nga vendet e pakta në Brazil ku mund të ecësh lirshëm me orë në dorë, pa frikën e grabitjeve.
Buajt janë të shumtë në numër në ishull. Legjenda thotë se ato arritën në Marajó pasi një anije franceze u mbyt në shekullin e 19-të, duke i lënë kafshët të notojnë deri në breg. Sot, rreth 600 000 buaj jetojnë në ishull, duke u përdorur si taksi, mjete transporti dhe burim ushqimi, duke përfshirë djathë dhe akullore me qumështin e tyre.
Megjithatë, krimi në ishull është i rrallë. Policia ka pak raste për të zgjidhur, përveç ndonjë grindjeje familjare apo vjedhjeve të vetë buajve. Për banorët, këto kafshë janë jo vetëm një pjesë e kulturës lokale, por edhe një simbol i sigurisë dhe krenarisë së ishullit të tyre të veçantë. /e.t
