Ashtu si parashikohej, McLaren dominoi edhe në Çmimin e Madh të Kinës. Oscar Piastri fitoi etapën e dytë të Botërorit 2025, duke kaluar në finish përpara shokut të skuadrës, Lando Norris, që javën e kaluar kishte triumfuar në Australi.
I nisur nga pole position, Piastri zhvilloi një garë perfekte, duke regjistruar suksesin e tretë në karrierë. Piloti australian konfirmoi se do të luftojë deri në fund me shokun e tij të ekipit, për titullin e kampionit të botës.
Norris nga ana e tij arriti të kalonte George Russell me Mercedes prej startit të garës, duke bërë që ky i fundit të ngjitej në shkallën e tretë të podiumit me një paraqitje solide dhe efikase.
Jashtë podiumit mbetën makinat Ferrari. Prej kthesës së dytë, Hamilton dhe Leclerc u përfshinë në një kontakt në pistë, me pilotin nga Monako që u detyrua ta vijonte garën me krahun e përparmë të dëmtuar.
Në gjysmën e garës, Hamilton u detyrua t’i hapte rrugën shokut të ekipit, që ishte dukshëm më i shpejt në pistë, për të provuar ofensivën ndaj Russell, por që ishte e pasuksesshme.
Sikur kjo të mos mjaftonte, tre xhiro përpara fundit, Leclerc humbi edhe betejën me Max Verstappen, i cili edhe pse u paraqit nën nivelin e pritur, e mbylli garën në vendin e katërt.
Pasi fitoi garën Sprint të së shtunës, Hamilton u pozicionua vetëm i gjashti, përpara Ocon që befasoi me makinën Haas, e cila ka gjithashtu motor Ferrari. /e.t
