Kryeministri Rama është ndalur këtë të dielë në qytetin e Vlorës, ku përveç takimeve politike, zhvilloi dhe një tryezë me operatorët turistikë, tashmë që sezoni turistik është në prag.
Teksa foli për planin e ri për ndarjen e plazheve publike dhe atyre private, kreu i qeverisë kishte dhe një apel për drejtuesit e hoteleve, të cilët sipas tij vijojnë të lundrojnë në informalitet.
Rama nuk harroi të ironizonte dhe një kërkesë për një tramvaj në Vlorë, për të cilin tha se mund ta bëjë vetëm Lulzim Basha, njësoj siç bëri atë në Tiranë.
“Kemi ndërtuar një plan të ri me një ndarje shumë të qartë dhe me një balancë shumë të arsyeshme mes plazheve private dhe atyre publike që do të menaxhohen nga bashkitë. I ftoj të ecin në gjurmët e bashkisë së Lezhës. Bashkia duhet të zhvillojë një sipërmarrje bashkiake që të kenë ofertën e tyre paralele me atë privat dhe t’iu ofrojnë qytetarëve shezlongë dhe çadra me çmime më të ulëta. Nuk do të ndërtojnë bashkitë dhe beach bar. Kjo është një gjë që do ta ofrojmë. E dyta që është po aq e rëndësishme.
Për tramin në Vlorë duhet Luli, në Tiranë e ka bërë, është i suksesshëm, kishte në plan për ta çuar deri në Durrës, por e zuri gjumi dhe e la.
Ka një hile të madhe që e bëni të gjithë ju. Një hile me deklarimin e netëve të fjetjes. Për të dalë faqebardhë nga kjo fazë informaliteti, ju kemi ulur TVSH në 6% që të deklaroni sa… Ka një shifër që thotë që nga 10 milionë turistë të huaj që e kanë vizituar Shqipërinë, 3.9 milionë netë qëndrimi janë pak problem. Do t’iu japim mundësinë që të bëni një paradeklarim. Nëse nuk doni kontrolle dhe të fokusoheni te klientët, një nivel shfrytëzimi 65% dhe do të paguani detyrimin te bashkia. E dimë që niveli do jetë më i lartë, por do e nisim këtu. Nga 30 tetori do të ketë një nivel 20%. Prapë ju do të keni një fitim ekstra. Në 2026 do të futet platforma digjitale e-vizitors dhe nuk do të shmangeni dot më”, tha Rama./ S,M
