Vitin e shkuar 61 bashkitë grumbulluan më shumë para nga taksa e pronës. Të dhënat nga Ministria e Financave tregojnë se nga 6.1 miliardë lekë në 2023-shin, njësitë e pushtetit vendor arkëtuan gati 7.7 miliardë lekë nga “detyrimi mbi pasurinë.”
“Ka ende hapësirë në drejtim të mbledhjes së të ardhurave nga taksa mbi pasurinë. Kjo hapësirë mund të vijë duke u ngushtuar me përfundimin reformës së administratës “online” ku të gjitha bashkitë do të kenë një panoramë më të qartë mbi objektet në territoret e tyre”, shpjegon Adelina Farrici.
Nga taksa mbi ndërtesat, vitin e shkuar u mblodhën më tepër para nga çfarë ishte planifikuar. Nga 7.3 miliardë lekë të pritura, 61 bashkitë grumbulluan 359 milionë lekë më tepër.
Tani a janë shfrytëzuar, në momentin e planifikimit a ka qenë ky real apo është vendosur një masë 10 për qind më shumë se vitit paraardhës, atëherë kjo lë për të diskutuar”, shton Farrici.
Të dhënat nga “financat” tregojnë se Tirana sjell gati gjysmën e totalit të parave nga taksa e pronës. Lista pasohet nga Elbasani, Vlora, Fieri dhe Durrësi.
“Kjo shkon në raport me numrin e popullsisë dhe banesave. Tirana ka përqendrimin më të lartë, ndaj ndodh kështu”, shtoi Farrici.
Nga viti 2026, për taksën e pronës e cila paguhet te fatura e ujit do të paguhet më shumë. Kjo për shkak të ndryshimeve ligjore. Taksa e pronës nuk do të llogaritet më mbi “çmimet referencë”, por në bazë të vlerës që ajo banese apo tokë ka. /E.T
