Mijëra besimtarë u mblodhën në Sheshin Skënderbej për Fitër Bajram, por falja nisi më herët se orari i njoftuar, duke lënë shumë prej tyre pa kryer këtë rit. Organizimi pati probleme, pasi zëri nuk u dëgjua në të gjithë hapësirën dhe besimtarët u çorientuan mes atyre që nisën faljen dhe të tjerëve që prisnin sinjalin. KMSH pranoi përgjegjësinë dhe e justifikoi situatën me probleme teknike të komunikimit. Besimtarët mund ta falin namazin edhe në shtëpi gjatë ditës së parë ose të dytë të Bajramit.
Mijëra qytetarë të Tiranës u mblodhën mëngjesin e djeshëm në qendër të kryeqytetit për të falur namazin e Fitër Bajramit, por shumë prej tyre nuk arritën ta kryenin këtë rit për shkak të mosrespektimit të orarit të njoftuar nga Komuniteti Mysliman i Shqipërisë (KMSH). Në njoftimet zyrtare, KMSH kishte bërë të ditur se falja do të zhvillohej në orën 07:30, por në realitet ajo u krye në 07:15. Ky ndryshim i papritur shkaktoi konfuzion mes besimtarëve, pasi shumë prej tyre ishin ende duke mbërritur ose ishin në pritje të njoftimit për fillimin e namazit. Një tjetër problem ishte shpërndarja e zërit në shesh, e cila nuk ishte e mjaftueshme për të mbuluar të gjithë hapësirën ku ishin vendosur vendfaljet. Kjo solli situata të çorientuara, ku një pjesë e besimtarëve filluan të faleshin, ndërsa të tjerët qëndronin ulur duke pritur sinjalin e faljes.
Reagimi i KMSH
Pas shqetësimeve të ngritura nga besimtarët, KMSH pranoi përgjegjësinë për moszbatimin e orarit dhe e justifikoi këtë situatë me probleme teknike të komunikimit. “Komuniteti Mysliman i Shqipërisë, duke marrë përsipër përgjegjësinë për moszbatimin e orarit të faljes së namazit të Bajramit në mënyrë konçize sipas lajmërimit të bërë më parë, ndan shqetësimet mëse me vend të besimtarëve. Kjo është një ngjarje që ka ndodhur për herë të parë në organizimin e Bajramit, e cila u shkaktua për arsye teknike të komunikimit në Sheshin Skënderbej”, thuhet në reagimin e KMSH-së. Ndërkohë, për të gjithë ata që nuk arritën ta falin Bajramin në shesh, KMSH sqaroi se namazi mund të kryhet edhe në shtëpi, individualisht ose me familjen, gjatë ditës së parë ose të dytë të Bajramit. Ky incident ka shkaktuar reagime të ndryshme, pasi për herë të parë ndodh që falja e Bajramit të mos respektojë orarin e njoftuar zyrtarisht. Për më tepër, mungesa e organizimit, siç ishte shpërndarja e dobët e zërit dhe mungesa e tapeteve për besimtarët, ka ngritur pikëpyetje mbi përgatitjet e bëra nga institucionet fetare për një event të tillë të rëndësishëm. Pavarësisht problematikave, Fitër Bajrami mbetet një ditë feste për besimtarët myslimanë, të cilët pas faljes së namazit ndanë urimet e tyre me familjarët dhe miqtë.
Berisha premton dyfishimin e fondit për komunitetet fetare dhe propozon ligj për faljen e së premtes
Lideri i opozitës, Sali Berisha, pas takimit me kreun e Komunitetit Mysliman të Shqipërisë (KMSH), dha një deklaratë për mediat ku premtoi rikthimin e pronave të komuniteteve fetare dhe rritjen e mbështetjes financiare për to. “Pas 11 majit, një nga vendimet e para do të jetë dyfishimi i fondit për komunitetet fetare. Ky fond është i domosdoshëm dhe u takon plotësisht. Po ashtu, do të ketë një përpjekje madhore për rikthimin e pronave ose kompensimin e tyre. Pronat e komuniteteve fetare janë ndër më të plaçkiturat në Shqipëri,” tha Berisha. Ai gjithashtu bëri një premtim të ri për besimtarët myslimanë, duke u shprehur se falja e namazit të së premtes do të përcaktohet me ligj dhe në orar të saktë, në mënyrë që të mos pengohet nga angazhimet zyrtare. “Unë garantoj, garantova dhe kreun e KMSH-së se falja ditën e premte do të përcaktohet në ligj dhe në orar dhe çdo besimtar mysliman që dëshiron të kryejë detyrën e tij me faljen në xhami do të ketë kohën e vënë për këtë destinacion. Pra, nuk do mund të bëhet orari zyrtar pengesë që njerëzit të falin të premten, që është dita për myslimanët, dhe kjo është detyrim. Do vendoset menjëherë pas 11 majit,” u shpreh Berisha. Ky premtim vjen në kuadër të fushatës për zgjedhjet e 11 majit, ku opozita synon të rikthehet në pushtet, ndërsa çështja e pronave të komuniteteve fetare dhe liria e ushtrimit të fesë mbeten tema të diskutuara prej vitesh në Shqipëri.
Presidenti Begaj dhe krerët e politikës urojnë besimtarët myslimanë për Fitër Bajramin
Në një atmosferë festive, Presidenti i Republikës, Bajram Begaj, ka uruar besimtarët myslimanë me rastin e Fitër Bajramit, duke theksuar rëndësinë e solidaritetit dhe bashkëjetesës fetare në Shqipëri. Nga selia e Komunitetit Mysliman Shqiptar në Tiranë, ai përcolli urimet e tij për begati, paqe dhe harmoni. “Dita e sotme është një ditë mirësie dhe solidariteti. Gëzuar Fitër Bajramin, qoftë kjo një ditë solidariteti dhe mirësie për të gjithë shqiptarët. Fjalët e Kuranit dhe të urtit Profetit Muhamed le të shërbejnë si frymëzim në jetën e përditshme. T’i shtrijmë dorën njëri-tjetrit, të ndihmojmë të pamundurit dhe të jemi të bashkuar në shërbim të interesit tonë madhor, harmonisë fetare, dialogut ndërfetar dhe interesit kombëtar,” u shpreh Begaj. Ndërkohë, kryetarja e Kuvendit, Elisa Spiropali, vizitoi selinë e KMSH-së për të uruar besimtarët myslimanë dhe për të shprehur vlerësimin e saj për këtë ditë të rëndësishme. “Është një ditë që na bën bashkë pas muajit të agjërimit, sakrificës dhe lutjeve të Ramazanit. Besimtarët myslimanë kremtojnë pranimin e sakrificave dhe lutjeve të tyre, por kjo është një ditë që rrezaton përtej komunitetit mysliman. Gjej rastin të uroj të gjithë shqiptarët, në Shqipëri, Diasporë dhe trevat shqiptare, për shëndet, gëzim dhe më shumë dashuri në jetët e tyre,” deklaroi Spiropali. Kryetari i Bashkisë së Tiranës, Erion Veliaj, gjithashtu iu bashkua urimeve për Fitër Bajramin, duke shprehur mirënjohjen për ata që ndoqën muajin e agjërimit dhe festojnë sot me familjet dhe komunitetin e tyre. “Gëzuar Fitër Bajramin! Urime të gjithë besimtarëve myslimanë për përfundimin e muajit të shenjtë të Ramazanit,” shkroi ai në rrjetet sociale. Krerët më të lartë të shtetit dhe drejtuesit e politikës përcollën mesazhe uniteti dhe solidariteti, duke nënvizuar rëndësinë e bashkëjetesës dhe respektit mes besimeve në Shqipëri./K.K
