Gjatë një takimi në shkollën “Besnik Sykja”, kryeministri Edi Rama deklaroi se ndalimi i TikTok në Shqipëri ishte një hap i domosdoshëm për të mbrojtur fëmijët nga ndikime negative.
“Më vjen shumë mirë që sot TikTok është mbyllur, duke u siguruar fëmijëve një mbrojtje nga një influencë shumë negative, që iu qëndronte në kokë 24 orë në 24,” tha Rama.
Ai paralajmëroi se përdorimi i VPN-ve për të aksesuar platformën mund të jetë i rrezikshëm për të dhënat personale të përdoruesve. “Mësuesit duhet t’iu shpjegojnë prindërve dhe nxënësve se përpjekja për të instaluar TikTok me VPN të lira e bën telefonin e grabitshëm me të dhënat që ka brenda,” shtoi ai.
Rama njoftoi gjithashtu se qeveria është në bisedime me kompaninë TikTok dhe se rikthimi i aksesit në platformë do të ndodhë vetëm nëse ajo ofron një propozim të besueshëm dhe filtra sigurie të forta për mbrojtjen e fëmijëve./e.t
