Çmimi i kafesë u rrit si rezultat i tarifave të reja të Presidentit të SHBA-së, Donald Trump, ndaj prodhuesve më të mëdhenj në botë.
Kjo u bë e ditur nga Financial Times dhe CNN të cilat theksojnë se tarifat, të cilat do të prekin importet e kafesë nga Brazili, Kolumbia dhe Vietnami, rritën çmimet në dyqane dhe kafene në një kohë kur kostoja e farave të kafesë tashmë ka arritur nivele rekord për shkak të mungesës së furnizimit.
SHBA importon pjesën më të madhe të kafesë nga Kolumbia dhe Brazili, dy prodhuesit më të mëdhenj në botë të kokrrave cilësore të kafesë Arabica. Mallrat e tyre do t’i nënshtrohen një tarife prej 10 për qind sipas masave të reja. Ndërkohë, tarifat e larta prej 46 për qind për mallrat vietnameze do të kenë gjithashtu një ndikim—kjo, pasi Vietnami është prodhuesi kryesor në botë i kokrrave më të lira robusta, të përdorura zakonisht në kafenë e çastit, dhe një eksportues i rëndësishëm për SHBA-në, raporton Financial Times.
Çmimet e kafesë tashmë kanë arritur nivele rekord në muajt e fundit për shkak të kushteve të pafavorshme të motit në rajonet kryesore prodhuese, përfshirë Brazilin. Ndërkohë, çmimet e kakaos pothuajse janë trefishuar gjatë vitit të fundit për shkak të motit ekstrem dhe sëmundjeve që kanë goditur të korrat, dhe pritet të rriten më tej për shkak të tarifave më të larta për importet nga Bregu i Fildishtë dhe Ekuadori. Bregu i Fildishtë, prodhuesi më i madh i kakaos në botë, është goditur nga tarifa prej 21 për qind.
Çmimi i kafesë ka pësuar në fakt një rritje thotë CNN, që nga viti 2011 pasi moti i keq ka pllakosur rajonet kryesore të rritjes së kafesë si Brazili dhe Kolumbia.
“Oferta është përmirësuar, por ende nuk është e mjaftueshme për të përmbushur kërkesën”, tha Ryan Delany, analisti kryesor në Akademinë e Tregtisë së Kafeve, e cila fokusohet në tregun global të kafesë.
SHBA nuk është një prodhues kafeje, me përjashtim të disa prodhimeve në Hawaii. SHBA importon shumicën e kafesë së saj dhe konsumatorët amerikanë priren të preferojnë kafen kolumbiane./ S,M
