Në vend të një dhurate të ëmbël, këtë Pashkë italianët do të përballen me një surprizë më të hidhur, rritjen e ndjeshme të çmimeve.
Emisioni Dritto e Rovescio, i transmetuar të enjten më 3 prill në Rete 4, solli një reportazh mbi këtë fenomen, duke analizuar sidomos çmimet në sektorin ushqimor, që kanë shënuar rritje të madhe në prag të festës.
Të gjitha vëmendjet janë përqendruar tek çmimi i vezëve të Pashkës, të cilat, sipas shifrave, kushtojnë deri në 40% më shumë se vitin e kaluar. Sipas Codacons, rritja e kostos së kakaos dhe kriza e furnizimit me gjalpë kanë bërë që çmimi i ëmbëlsirës tradicionale Colomba të rritet me 36%, ndërsa ai i vezëve me 40%.
Pastiçeri Adolfo Stefanelli, i intervistuar nga Rete 4, konfirmoi rritjen progresive të çmimeve:
“Këto vezë sot kushtojnë rreth 70 euro,” – shpjegoi ai. “Më parë i shisja për 60 euro, tre vjet më parë për 45, dhe katër vjet më parë për 40. Çmimet kanë filluar të rriten gjithnjë e më shpesh vitet e fundit.”
Ndër faktorët kryesorë është çmimi i kakaos, i cili, sipas Stefanellit, është rritur me 175%. “Kjo ka ndikuar te të gjitha produktet që përmbajnë kakao – nga ushqimet e shpejta e deri te vezët e Pashkës. Vetëm kostoja ditore e energjisë në pastiçeri shkon deri në gjashtë mijë euro.”
Në reportazh u paraqit edhe një tabelë ku evidentohet rritja e çmimeve të lëndëve të para. Vetëm çokollata e zezë ka kaluar nga 17.60 euro për kilogram në maj 2024, në 36.47 euro aktualisht. Në një makinë që përpunon 20 kg çokollatë, kjo nënkupton gati dy mijë euro shpenzime.
Edhe çmimi i ambalazhit është rritur ndjeshëm, duke shtuar shqetësimin e pastiçierëve. “Kisha frikë se do humbisja klientët,” pranoi Stefanelli.
Situata nuk është më e mirë as në supermarkete, ku vezët e Pashkës po shiten me çmime që arrijnë deri në 90 euro për kilogram. Pashka këtë vit nuk ka qenë kurrë më e shtrenjtë./k.k
