Kur viziton një destinacion jashtëzakonisht të njohur, si mund të sigurosh edhe privatësinë dhe qetësinë maksimale njëkohësisht?
Duke u akomoduar në “parajsën” tënde personale. Në këtë artikull ne kemi përzgjedhur shtatë suita të mrekullueshme hoteli nëpër botë, ku dizajni madhështor dhe komoditetet luksoze ndërthuren me vendndodhje të jashtëzakonshme.
Suita Imperial, Four Seasons Otemachi, Tokio
Pamjet marramendëse nga Four Seasons Otemachi janë një spektakël i dyfishtë, nga njëra anë kopshtet mbretërore të Pallatit Imperial që shtrihen poshtë, dhe nga ana tjetër horizonti magjepsës i Tokios që shtrihet përtej. I ndodhur në lartësinë e katit të 39-të, çdo cep i këtij hoteli modern dhe elegant është i kuruar me detaje luksoze dhe elemente bashkëkohore që nga spa-ja dhe pishina me dizajn të sofistikuar, te bari misterioz dhe romantik Virtu, tarraca me pamje mahnitëse dhe restoranti me yll Michelin, Est. E quajtur me plot të drejtë “Suita Imperial”, kjo hapësirë mbretërore është më e veçanta nga të gjitha, duke ofruar pamje panoramike të pallatit përmes dritareve nga dyshemeja në tavan. Suita është e mbushur me dritë natyrale dhe përfshin dy dhoma gjumi (me mundësinë për një të tretë), një zyrë të veçuar dhe një hapësirë të bollshme ngrënieje dhe ndenjeje të stilit ‘open space’.
Vilat Oqean në Amanpuri, Tajlandë
Me një vendndodhje të privilegjuar në majë të gadishullit, mbi Detin Andaman, vilat oqean të Amanpuri ofrojnë kulmin e qetësisë dhe relaksit. Këto vila të veçuara, me disa dhoma gjumi, janë dizajnuar me kujdes për të reflektuar arkitekturën budiste të qytetërimit të lashtë Ayutthaya, ndërsa ambientet e brendshme të qeta shtrihen në tarraca të mëdha dhe pishina private që janë qendra e vëmendjes, të gjitha duke ofruar pamje të mrekullueshme drejt ujërave të kaltërta dhe kristal të detit. Për një përvojë akoma më të veçantë, vila vjen me një shef personal që përgatit një përzgjedhje magjepsëse të gatimeve tradicionale vendase.
The Castaway në Soneva Secret, Maldive
Nëse privatësia absolute është qëllimi, atëherë nën emrin luksoz të Soneva, ky vend ofron përvojën maksimale kush askush nuk ju shqetëson aspak. Soneva Secret është një “koleksion” ëndrrash vilash të vendosura në Haa Dhaalu, ishulli më i largët dhe më i paprekur i Maldiveve. Në total janë vetëm 14 rezidenca, përfshirë dhe vilën e parë lundruese në këtë zonë, që i lejon vizitorët të notojnë simbolikisht në pafundësinë e blusë detare. Vila “The Castaway” është e arritshme vetëm me det dhe është projektuar mjeshtërisht për të mos ndikuar nga lëvizjet e dallgëve. Kulmi i përvojës? Çatia që hapet mbi suiten kryesore, për një gjumë nën qiellin plot yje.
Penthouse në Claridge’s, Londër
Mbi lagjen prestigjioze Mayfair të Londrës, “The Penthouse” në Claridge’s është një ikonë e re e luksit që ndodhet në një nga pjesët më historike të qytetit. Pas një rinovimi gjashtëvjeçar, i gjithë çatia e hotelit legjendar është transformuar në një apartament madhështor prej 1,500 m², që përfshin një tarracë private panoramike me pamje 360 gradë, një pishinë me ngrohje dhe një pavijon me piano të vendosur në një strukturë prej bakri dhe xhami – me pamje të parezistueshme të perëndimit mbi horizontin e Londrës. Dizajni bashkëkohor dhe elegant mban firmën e vizionarit Rémi Tessier dhe përfshin, ndër të tjera, koleksionin më të madh privat në botë të veprave të Damien Hirst.
Grand Riad në Royal Mansour, Marrakesh
Në Royal Mansour të Marrakeshit, akomodimi është një përvojë më vete: ‘riad’-e trekatëshe, secila me dekor unik, të shpërndara nëpër medinën historike dhe të lidhura përmes rrugicave e dyerve sekrete. Ndër to, më madhështori është Grand Riad, i arritshëm përmes një oborri të rrethuar me ullinj, që të çon drejt një kopshti të gjelbër të kuruar me përpikëri deri në detaje dhe një pishine të hijëzuar nga palmat. Kjo banesë luksoze me katër dhoma gjumi është e mbuluar me pëlhura të pasura dhe e zbukuruar me objekte të rafinuara, ndërsa nuk mungon as hamami privat për çaste relaksi dhe shplodhjeje të vërtetë.
Cave Royale në Six Senses Ibiza, Ishujt Baleare
E pozicionuar mbi gjirin mahnitës të Cala Xarraca, në veriun e Ibizës, Six Senses Ibiza ndërthur fuqinë shëruese të ishullit me shpirtin bohemian të muzikës, artit dhe kulturës që e karakterizon. Suita Cave Royale është përfaqësimi i përkryer i këtij kombinimi, me ambiente të brendshme minimaliste dhe relaksuese, një tarracë të gjelbër që zbret direkt në det, një vaskë të madhe të hapur në natyrë, bar të pajisur plotësisht brenda me gjithçka dhe hapësirë ngrënieje jashtë. Dhe për një prekje unike: qasje private në studion moderne të regjistrimit të resortit, për ata që duan të krijojnë apo thjesht të përjetojnë muzikën në një atmosferë magjike.
Suita Bellini në Passalacqua, Liqeni Komo, Itali
Suita më e madhe në Liqenin Komo është një perlë e vërtetë në kurorën e vilës së famshme të shekullit XVIII, Passalacqua. Ky vend i mrekullueshëm është restauruar me kujdes dhe dashuri, duke ruajtur historinë që fshehin muret e tij, të vizituar ndër shekuj nga figura të tilla si Napoleon Bonaparte dhe Winston Churchill. Suita Bellini është dizajnuar në mënyrë të përkryer si një homazh ndaj stilit barok italian. Nën tavane të larta të harkuara me llamba qelqi tërheqëse, dritaret e mëdha hapen drejt brigjeve të liqenit. Zemra e kësaj suite mbretërore është salloni muzikor në stil neoklasik, pikërisht aty ku kompozitori Vincenzo Bellini u frymëzua nga pamja mahnitëse dhe krijoi pasazhe muzikore në shekullin XIX./k.k
