Nga Monada Mehmetaj – Strasburg
Në Strasburg, qyteti që përmbledh historinë europiane në gurët e kalldrëmeve dhe në kupolat e institucioneve ndërkombëtare, politika shqiptare mori sot një frymë të re. Ish-kryeministri dhe kryetari i Partisë Demokratike, Sali Berisha, zhvilloi një vizitë zyrtare në Këshillin e Europës, në kuadër të intensifikimit të fushatës për zgjedhjet e 11 majit në Shqipëri. Kjo vizitë, më shumë se simbolike, përbën një përpjekje për ta shtrirë betejën politike përtej kufijve shqiptarë, në arenën ku ndërtohen aleancat strategjike dhe ku fjala politike matet me vlerë europiane.
Berisha shoqërohej nga deputetja Albana Vokshi, kreu i PBDNJ-së Vangjel Dule, kryetari i Partisë Republikane Fatmir Mediu dhe Enri Ceno, Sekretar për Marrëdhëniet me Jashtë në PD. Delegacioni opozitar zhvilloi një sërë takimesh të nivelit të lartë, përfshirë prezantime në Grupin e Partive Popullore Europiane (EPP), takime me presidentin e Asamblesë Parlamentare të Këshillit të Europës, Theodoros Rousopoulos, dhe me përfaqësues të delegacioneve italiane, suedeze dhe greke.
Në fokus të agjendës ishte paraqitja e platformës politike të opozitës dhe vënia në dukje e asaj që Berisha e cilëson si “regjim hibrid” në Shqipëri. Në këtë kontekst, ai prezantoi tri nga shtyllat themelore të programit të opozitës: “Compassion Package” – një paketë për lehtësimin social dhe ndihmën ndaj shtresave në nevojë, “Made in Albania” – për nxitjen e prodhimit vendas dhe mbështetjen e ekonomisë kombëtare, si dhe një sërë lehtësirash fiskale për biznesin dhe sipërmarrjen e lirë.
Në Strasburg, fushata e Berishës nuk u shfaq thjesht si një garë për vota, por si një strategji për të siguruar mbështetje morale dhe politike nga institucionet europiane. Takimet në Këshillin e Europës u zhvilluan në një atmosferë ku shqetësimet për gjendjen e demokracisë, lirinë e medias dhe kapjen e institucioneve në Shqipëri ishin pjesë e diskursit të çdo tryeze.
Ky hap i opozitës vjen në një moment vendimtar për politikën shqiptare, në prag të një procesi zgjedhor që pritet të përcaktojë jo vetëm fatin e përballjes së majtë-djathtë, por edhe raportin e Shqipërisë me vlerat europiane në praktikë. Me këtë vizitë në Strasburg, opozita kërkon të përcjellë mesazhin se Shqipëria nuk është një çështje e izoluar kombëtare, por një pjesë e pandashme e familjes europiane – e cila duhet të dëgjojë dhe të ndërhyjë kur parimet e demokracisë vihen në rrezik.
Fushata shqiptare, kështu, ka marrë formën e një odiseje që prek jo vetëm sheshet e qyteteve shqiptare, por edhe tavolinat diplomatike të Europës. Dhe në këtë rrugëtim, zëri i opozitës nuk kërkon vetëm votën e popullit, por edhe mbështetjen e ndërgjegjes europiane./E.S
