Anija e parë muze në botë, “Art Explora”, ka mbërritur në Portin e Durrësit, si pjesë e një turneu kulturor mesdhetar që do të zgjasë deri në vitin 2027.
Në bashkëpunim me Bashkimin Europian dhe aktorë të ndryshëm të fushës së kulturës, ky projekt synon të krijojë ura të reja mes vendeve në Mesdhe.
Ashtu sikurse është bërë me dije dhe më herët ky festival sjell përvoja artistike dhe edukative për qytetarët, përmes ekspozitave, shfaqjeve, koncerteve. Këto aktivitete do të zhvillohen si në bordin e anijes, ashtu edhe në hapësira të dedikuara në qytet.
Nga pranvera 2024 kjo anije ka nisur një udhëtim që do të ndalet në 15 vende të Mesdheut deri në vitin 2027, që janë djep i qytetërimeve të mëdha dhe ndërthurjes së kulturave, duke ndërlidhur artistë, kuratorë ekspozitash, organizata të kulturës, edukimit dhe OJF që të gjithë së bashku do të përfytyrojnë një vizion të ri të Mesdheut. 5 nga këto ndalesa janë bashkëfinancuar nga Bashkimi Evropian, përmes programit Europa Krijuese.
Pas gjashtë ndalesash në vitin 2024, Festivali Art Explora ndalesën e parë në vendin tonë e bëri në Durrës ku dhe do të qëndrojë e ankoruar nga data 10 në 21 prill. Aktivitetet përgjatë 10 ditëve do të ndalen në Durrës dhe në Tiranë, një pjesë e të cilave në anijen muze dhe në pavijonet e ekspozitave.
Katamarani është anija e parë muze në botë. Projektuar nga arkitektët Axel de Beaufort dhe Guillaume Verdier, ajo është 47 metra e gjatë dhe 55 metra e lartë. Anija u ndërtua në kantierin detar Perini Navi në Itali. Ajo mund të strehojë 2000 njerëz në bord çdo ditë dhe ofron një ekspozitë përfshirëse e projektuar me bashkëpunimin e jashtëzakonshëm të Muzeut të Louvre, një përvojë zanore e zhvilluar me Ircam dhe rezidencat e artistëve në bord.
Një vepër e guximshme e inxhinierisë dhe arkitekturës detare, anija muze e Festivalit Art Explora është mjeti kryesor për rrugëtimin e tij në Mesdhe. E projektuar nga Axel de Beaufort dhe Guillaume Verdier, ajo u ndërtua në vetëm tre vjet nga kantieri i anijeve Perini Navi në La Spezia, Itali, një kornizë kohore e jashtëzakonshme duke pasur parasysh kompleksitetin e saj.
Dizajni i saj minimalist dhe i rafinuar është rezultat i një bashkëpunimi midis shumë ekspertëve, duke filluar nga arkitektët detarë te inxhinierët e materialeve të përbëra, duke përfshirë specialistë të NASA-s, të cilët kontribuan në përgatitjen e xhamave të lakuar të bërë me porosi.
Ky katamaran 47 metra i gjatë u projektua për të kombinuar aksesin dhe respektin për mjedisin.
Anija e parë muze e imagjinuar ndonjëherë, ajo mund të strehojë deri në 2000 vizitorë në ditë, duke u ofruar atyre një përvojë unike në bord. E shoqëruar nga një festival kulturor multidisiplinar që zhvillohet në skelë, ajo tërheq vëmendjen dhe mishëron një mënyrë të re të qarkullimit të artit në Mesdhe./E.S
