Të gjitha mallrat dhe produktet shqiptare që shkojnë drejt Shteteve të Bashkuara do të kenë një tarifë prej 10%, pas aplikimit të tarifave tregtare nga administrata e Presidentit Trump. Shqipëria, së bashku me Kosovën dhe Malin e Zi, është një nga tri vendet që do të përballen me këtë tarifë, ndërsa për produktet nga Maqedonia e Veriut, Bosnje-Hercegovina dhe Serbia, tarifat variojnë nga 33% deri në 37%. Kjo masë do të ketë ndikim edhe në ekonominë shqiptare, duke pasur parasysh se 58.9% e tregtisë së jashtme të Shqipërisë është me Bashkimin Europian, ku tarifat 20% mund të shkaktojnë ndryshime.
Shqipëria importon mallra të rëndësishme nga SHBA, si ushqime, automjete, çelik dhe mobilje, dhe ka renditjen e pestë në këtë kategori, me një vlerë importesh që arriti në 20.5 miliardë euro vitin e kaluar. Në dy muajt e parë të vitit 2025, importet nga SHBA ranë në 2.7 miliardë lekë, krahasuar me 4.3 miliardë lekë të një viti më parë. Shqipëria eksporton kryesisht ushqime, pije joalkoolike, materiale ndërtimi dhe bimë mjekësore, ndërsa vlera e eksporteve shqiptare në SHBA arriti në 7 miliardë euro vitin 2024. Megjithatë, këto eksporte kanë shënuar një rënie të lehtë gjatë periudhës janar-shkurt të vitit 2025, duke u ulur në 653 milionë lekë, krahasuar me 749 milionë lekë në të njëjtën periudhë të vitit të kaluar.
Agjentët doganorë amerikanë kanë filluar mbledhjen e tarifave në portet detare, aeroportet dhe magazinat doganore të SHBA, dhe për mallrat që nuk kanë mbërritur ende, është caktuar një periudhë lehtësimi deri më 27 maj. Po ashtu, tarifat reciproke do të hyjnë në fuqi më 00:01 të së mërkurës, ku importet nga Bashkimi Europian do të taksohen me 20%, ndërsa ato nga Kina me 34%, duke e çuar tarifën totale për Kinën në 54%. Shtete të tjera, si Vietnami, gjithashtu do të preken nga tarifa të larta, ndërsa Kanadaja dhe Meksika janë përjashtuar për shkak të marrëveshjeve të mëparshme./ S,M
