Po mbahet sot seanca për operacionin “Plumbi i artë” në ambientet e Gjykatës së Posaçme të Shkallës së Parë për Krimet e Rënda (GJKKO), ku po trajtohen deklaratat e bërë nga i pandehuri Xhulian Hoxha. Ai ka theksuar se, për vrasjen e Oti Kilo, organizatori dhe financuesi nuk është Suel Çela, siç është pretenduar nga Nuredin Dumani, por Erjon Alibej, pasi ky i fundit ka pasur një marrëdhënie intime me bashkëshorten e Kilos.
Xhulian Hoxha ka shtuar se në një moment tjetër do të japë më shumë detaje rreth këtij pretendimi. Ndërkohë, i penduari për drejtësinë, Erjon Alibej, ka reaguar duke thënë se nuk është etike që ky informacion të publikohet në media, duke e kundërshtuar deklaratën e Hoxhës.
Debati mes Hoxhës dhe Alibejt është intensifikuar në sallë, ku Xhulian Hoxha i është drejtuar Alibejt duke i thënë: “Kam marrë burg përjetë për fjalët e tua, ty çfarë të dogji, nga ajo që thashë unë”.
Alibej ka reaguar duke deklaruar: “Mediat të bëjnë durim deri sa unë të filloj deklarimet, do dëgjoni jo vetëm për Suel Çelën, por edhe për shumë Suel Çela të tjerë të Shqipërisë. Janë thënë shumë trillime dhe shumë të pavërteta. Bëni durim se do sqarohen të gjitha.”
Ky debat ka tensionuar më tej zhvillimet në seancën hetuese për operacionin “Plumbi i Artë”./E.S
