Shqipëria është mes nëntë vendeve, që BBC u sugjeron lexuesve t’i vizitojnë përgjatë vitit 2025.
Në artikull, prestigjiozja britanike shkruan se Shqipëria ka qenë prej kohësh një nga destinacionet më të nënvlerësuara të Evropës, por tashmë numri i turistëve po rritet me shpejtësia, ndikuar kjo edhe nga lehtësirat e udhëtimit, si fluturimet e shumta.
Në vitin 2024, Shqipëria mirëpriti një rekord prej 11.7 milionë vizitorësh, një rritje e nxitur nga interesi për arratisjet drejt vendeve më pak të njohura të Mesdheut, vijon BBC.
“Shqipëria po fiton shpejt njohjen për përzierjen e saj të historisë, bregdetin e paprishur dhe skenën në zhvillim të ushqimit dhe verës“, thotë blogerja e udhëtimeve, Kimberly Denison. “Qyteti i Gjirokastrës i regjistruar në listën e UNESCO-s, plazhet e pacenuara të Rivierës Shqiptare dhe vreshtat e Beratit krijojnë një arratisje mesdhetare që po merr vrull me shpejtësi”, shton Denison.
Ndërsa plazhet si Ksamili po rriten në popullaritet, udhëtarët që shkojnë pak përtej turmave shpërblehen me ujëra të pastër bruz që rivalizojnë ishujt grekë, vë në dukje BBC. Në brendësi, peizazhet dramatike të Maleve të Nemuna tërheqin alpinistët dhe aventurierët në veri të vendit. Artikulli thekson se ka shumë hapësira akomoduese, përfshirë edhe hotelet apo vilat luksoze, ndërsa thotë se periudha më e mirë për të vizituar Shqipërinë është vera, me një mot ideal për plazhe, ecje dhe eksplorim.
Vendet e tjera që propozon BBC në këtë artikull janë Pulia në Itali, Bregu Alentejo në Portugali, Andermatt-Sedrun-Disentis në Zvicër, Riviera Franceze, Sllovenia, Peloponezi në Greqi, Parisi në Francë dhe bregdeti perëndimor i Suedisë./ S.M
