Rruga që të çon drejt një prej destinacioneve më të kërkuara turistike malore, fshatit të Thethit, rrezikon të bllokohet nga rrëshqitjet e gurëve masive ne segmente te ndryshme të rrugës.
Prej më shumë se një muaji ky aks nuk ka më mirëmbajtje, pasi firmës që kryente mirëmbajtjen i ka mbaruar kontrata dhe lidhja e kontratës së re është në proces apelimi. Ka mjaftuar një muaj pa mirëmbajtje që rruga, siç duket edhe nga pamjet, të kthehet në një rrezik serioz për të gjithë përdoruesit e saj.
“Një dit që kemi kaluar këtu, para një jave kur ka ra një stuhi e madhe, i kemi gjet gurët në rrugë dhe i kemi shty me disa njerëz, që kemi kalu me dy makina. Kërkojmë që të mirëmbahet kjo rrugë, meqë po vijnë edhe turistë.
“Siç po e shihni vetë po rrezikojmë përditë, me gurët, me pastrimin e rrugëve.”
“Kena mbet përditë duke heq gurë rrugës me dorë, me fshatarët që janë këtu në Theth, duke i pastru vetë. Kërkojmë pastrimin e rrugës, mirëmbajtjen, kush përgjigjet për këtë gjë.”
Përveç gurëve, turistët e huaj ndihen të shqetësuar edhe për ngricat në segmente te caktuara të rrugës.
“Shume e vështire kjo situatë në këtë rrugë për mua. Erdhëm këtu dhe ky aks nuk është aspak i mirë, me gurë në rrugë. Kishte edhe ngrica kur erdhëm ne dhe kemi humbur më shumë se dy orë sepse duhej kujdes. Rruga shumë e ngushtë dhe duke patur parasysh edhe gurët dhe ngricat, ishte një rrezik për ne. Kemi ecur shumë ngadalë”, tha një turist.
Tashmë Thethi nis mbipopullimin nga turistët e shumtë që shkojnë dhe fluksi i lëvizjeve rritet ndjeshëm atje. Por pa mirëmbajtje kjo rrugë rrezikon mbylljen e saj dhe në të njëjtën kohë rrezikon edhe turistët. /e.t
