Agjencia për Administrimin e Pasurive të Sekuestruara dhe Konfiskuara ka raportuar një rritje të ndjeshme të të ardhurave për 3-mujorin e parë të vitit 2025. Sipas të dhënave të publikuara, të ardhurat nga qiradhënia e pasurive të sekuestruara dhe konfiskuara kanë dyfishuar shifrat e vitit të kaluar, duke arritur në rreth 50 milionë lekë, krahasuar me 24.4 milionë lekë që ishin për të njëjtën periudhë në vitin 2024.
Në këtë mënyrë, AAPSK vazhdon të ruajë ritmin e rritjes së të ardhurave, pasi në fund të vitit 2024 ka arritur një total prej 159 milionë lekë, duke shënuar një rritje prej 96.2% krahasuar me vitin 2023.
Kjo rritje është arritur përmes një menaxhimi më efikas dhe rritjes së numrit të pronave të sekuestruara ose konfiskuara që janë dhënë me qira nga Agjencia. Të ardhurat e mbledhura nga qiradhënia përdoren për detyrat funksionale të Agjencisë, kompensimin e viktimave të krimit, mbështetje për agjencitë ligjzbatuese dhe investime infrastrukturore për komunitetin.
Menaxhimi i pasurive të sekuestruara dhe konfiskuara nga AAPSK kontribuon në përfitime të mëdha për shtetin dhe komunitetin, duke ofruar mundësi për shfrytëzimin e këtyre pasurive pa i tjetërsuar ato./E.T
