Me ardhjen e pranverës, gjithçka nis të marrë jetë: natyra gjallërohet, dielli ngroh më shumë dhe dita zgjatet. Është koha perfekte për të “rilindur” edhe vetë – për të rimarrë energjinë pas dimrit të gjatë dhe për t’u kujdesur më mirë për trupin, mendjen dhe lëkurën.
Nuk është gjithmonë e lehtë të dalësh nga shtrati, por po të lësh dritën të hyjë në dhomë, zgjimi bëhet më i butë dhe natyral. Drita ndihmon trupin të aktivizohet, pa stres, pa zhurmë thjesht me energjinë e mëngjesit.
Pranvera është koha perfekte për të rregulluar edhe zakonet e mëngjesit. Filloni ditën me një çaj të nxehtë limoni pastron trupin, hidraton lëkurën dhe forcon sistemin imunitar. Shtoni një mëngjes të lehtë: bukë të thekur, fruta të freskëta, drithëra dhe pak proteina. Dhe nëse e ndani mëngjesin me familjen? Aq më mirë – bashkë, dita nis më bukur!
Një dush i ngrohtë në mëngjes relakson muskujt, por për një ‘shkundje’ të vërtetë zgjimi, mbylleni me pak ujë të ftohtë kjo stimulon qarkullimin e gjakut dhe ju jep gjallëri. Pas dushit, mos harroni kremrat hidratues, sidomos ata me mbrojtje nga dielli – janë të domosdoshëm në pranverë!
Pastrimi i fytyrës dhe aplikimi i një kremi mbrojtës mund të bëhet pjesë e rutinës për të gjithë edhe për më të vegjlit. Pse jo? Një mënyrë e mirë për të mësuar kujdesin ndaj vetes që në fëmijëri.
Nëse mundeni, çoni fëmijët në shkollë në këmbë. Është një mënyrë e shkëlqyer për të filluar ditën me lëvizje, për të shmangur trafikun dhe për të kaluar pak kohë të qetë bashkë. Edhe për adoleshentët, kjo është mënyra më e thjeshtë për të aktivizuar trupin e për të rritur përqendrimin dhe kujtesën në klasë./k.k
