Nga sot, 14 prill, e deri më datën 30 Maj do të jenë të hapura aplikimet për fermerët për të përfituar nga mbështetja buxhetore. Irfan Tarelli, Drejtor i Politikave Bujqësore, i ftuar në “E-ZONE” sqaroi se kush ka të drejtë të përfitojë dhe kriteret përkatëse.
“Kanë të drejtë të aplikojë çdo fermer individual që është i regjistruar në regjistrin e fermerëve si dhe ka dhe NIPT, grupet e fermerëve, personat fizik dhe juridik si dhe shoqëritë e bashkëpunimit bujqësorë. Edhe këtë vit nuk ka rëndësi koha e aplikimit, rëndësi ka që të aplikojnë saktë dhe të plotësojnë kriteret“, – tha Tarelli në Vizion Plus.
Sipas tij, pritshmëritë janë që përfituesit edhe këtë vit të jenë thuajse njësoj si një vit më parë. Por sa është buxheti i skemës kombëtare
Buxheti i parashikuar arrin në 4.4 miliardë lekë. Kjo shifër është vërtet më e ulët se një vit më parë, por qeveria gjithmonë ka rishikuar buxhetin me akte normative, duke e shtuar më tej buxhetin deri në fund të vitit. Ndaj mund të them se ky është një buxhet fillestar. Sa i përket përfituesve ne mendojmë se do të jenë mbi 60 mijë fermerë, që do të përfitojnë nga skemat mbështetëse.
“Në total janë tetë masa mbështetëse, por ajo që zë një vend të rëndësishëm është mbështetja për blegtorinë, ku parashikohet 5 mijë lekë për krerë. Sipas Tarellit fermerët bëjnë mirë që të konsultohen me zyrat bujqësore rajonale për të shmangur çdo gabim.
Fermerët do të përfitojnë edhe këtë vit naftë pa taksa. Por kujdes këtë vit ka një kusht të ri, duhet të dokumentojnë me fatura që kanë blerë produkte për punimin e tokës, si një mjet për të verifikuar që mbështetja të shkojnë tek ai që ka vërtetë nevojë. Ky kusht është vendosur për të shmangur çdo devijim“, – tha Tarelli.
Gjatë këtij viti janë tri skema që do të aplikohen në mbështetje të bujqësisë. Skema kombëtare, skema e investimeve e nisur një vit më parë dhe aktualisht do të shpallen fituesit si dhe garancia sovrane.
Aktualisht është në fazën finale dhe pritet të nisë aplikimin garancia sovrane për ata fermerë që kanë nevojë për financim, por që u mungon kolaterali për ta paraqitur në bankë./e.t
