Edicioni i lajmeve në Televizionin Publik të Serbisë mbrëmjen e së mërkurës nisi me një studio të improvizuar… Kjo erdhi pasi studentët bashkë me kategori të tjera shoqërore vazhdojnë protestën më të madhe antiqeveritare. Ata prej më shumë se 60 orësh kanë vendosur që në shenjë revolte të bllokojnë të gjitha hyrjet dhe daljet e godinës së Televizionit Publik të Serbisë, RST, në Beograd.
“Po protestojmë kundër Radio Televizionit të Serbisë pasi kohët e fundit nuk e kanë bërë punën e tyre dhe po nisin që t’i bezdisin njerëzit, veçanërisht ne studentët dhe qytetarët janë të informuar mjaftueshëm për të ditur që RTS po na mban ne në terr mediatik. Prandaj është koha të rebelohemi dhe t’i themi stop”, tha Nikola Jovaniç, student.
“Ne erdhëm këtu, sigurisht, për të mbështetur studentët dhe kërkesat e tyre. Gjithashtu për të provuar edhe njëherë se ajo çfarë ka bërë RTS për shumë kohë nuk është e drejtë”, tha Ana Andrijeviç, protestuese.
Manifesuesit, që bllokuan stafin të hyjë në ndërtesën e RTS, detyruan drejtuesit e transmetuesit publik që të ndryshonte programin, duke transmetuar lajme flash dhe vetëm filma e dokumentarë. Një prej redaktorëve të Televizionit Publik të Serbisë tha se nuk e di se prej ku po bëhet transmetimi i sinjalit, pasi nuk po bëhet nga ndërtesa e RTS.
Studentët kanë publikuar një letër në Instagram të mërkurën në mbrëmje drejtuar Komisionit për Kulturë dhe Informim të Kuvendit Popullor, në të cilën kërkojnë që të bëhet një thirrje publike për anëtarët e rinj të Këshillit të Organit Rregullativ për Media Elektronike. Ndër të tjera, ata kujtuan se mandati i Këshillit të mëparshëm i atij organi i ka skaduar më 4 nëntor të vitit të kaluar. Ata bënë të ditur se bllokada e Radio Televizionit të Serbisë do të zgjasë deri në shpalljen e thirrjes publike për zgjedhjen e anëtarëve të Organit Rregullativ për Media Elektronike./E.T
