Këngët e Irini Qirjakos kushtuar dasmave dhe Shqipërisë kanë qenë padyshim pjesë e çdo gëzimi e feste shqiptare. Në “Rudina” ajo gjithmonë ka sjellë këngë dhe bashkëpunime me këngëtarë shumë të njohur të muzikës shqiptare, siç është dhe bashkëpunimi i saj i fundit me Dule Majlindin.
Këtë të premte në emisionin “Rudina” në Tv Klan ajo zbulon një prej projekteve të saj të së ardhmes. Nuk ka të bëjë me atë që jemi mësuar të dëgjojmë gjithmonë nga “Bilbili i Labërisë”, është një këngë totalisht ndryshe. Është një dedikim për nënën e saj të ndjerë që ka ndërruar jetë dy vite më parë. Siç tregon këngëtarja ky vendim erdhi pasi ajo pa nënën e saj në ëndërr.
“Kam një projekt për nënën time. Nuk e kisha menduar që do bëja këngë për nënën. Ka dy vjet që më ka lënë. Mua shumë më kërkojnë që të bëj këngë kështu, dedikime, por unë nuk i preferoj këto. Është natyra dhe mendja ime që nuk do. Pashë në ëndërr nënën time, sikur po i këndoja një këngë. Edhe kur e kam çuar në banesën e fundit ajo më ka kërkuar që ta përcillja me këngë. Dhe unë këtë bëra, e përcolla me këngë dhe nuk lashë asnjë njeri që të qante aty.
E përcolla me një këngë me dhimbje brenda. Kur më doli mamaja në ëndërr, e kisha në distancë dhe unë po i këndoja këngë. Ajo po qeshte e lumtur që i kisha bërë këngën. Kur u çova i thashë bashkëshortit tim që unë do i bëj këngë nënës sime, se më doli dhe në ëndërr”, tregon këngëtarja./ S,M
