Pritja e ngrohtë që iu ofrua nga qytetarët e Pukës, ia shtoi optimizmin Sali Berishës. Në sheshin kryesor të qytetit, lideri demokrat pohoi se kishte shkuar me një dhuratë për banorët e Pukës.
“Unë sjell këtu në Pukë mesazhin e fitores. Sjell tek ju optimizmin, besimin, vendosmërinë e shqiptarëve në Shqipëri dhe jashtë Shqipërie për një fitore historike më 11 maj”, tha Berisha.
Demokratëve të Pukës u tha se vota për numrin 1 do t’u rikthejë në qytet shpresën dhe të rinjtë e larguar në emigracion. “11 Maji është një ditë për një kthesë vendimtare për shqiptarët që ëndrrat e tyre t’i vendosin në Shqipëri. Është një ditë për një kthesë vendimtare që këta të rinj, ëndrrën e tyre shqiptare ta ndërtojnë në Shqipëri”.
Një përgjigje kishte për Edi Ramën, i cili në takimet e fundit elektorale ka pohuar se shteti aktualisht nuk ka kapacitete për të dyfishuar pensionet. “Kur ne, kërkuam të votohet ligji i minimumit jetik, kjo tha na çon në humnerë. Çfarë humnere mor i pashpirt? Pse nuk ra në humnerë Mali i Zi që i trefishoi pensionet? Pse nuk ra në humnerë Maqedonia, Kosova apo Serbia? Pse nuk ramë ne në humnerë kur pensionet që ishin 36 mijë lekë, i bëmë 82 mijë lekë?”.
Premtoi klimë miqësore ndaj biznesit dhe investime në infrastrukturë, ku pohoi se me përparësi do të jetë investimi për tunelin Rreps-Gjegjan.
Ndërsa premtimin e Ramës për pasaportën evropiane e quan mashtrim. “Pasaporta evropiane e Ramës është si djegësi i Tiranës. Është si premtimi për shëndetësinë falas”./e.t
